Шимолий Корея Россиянинг Украинадаги урушида иштирокини кенгайтирмоқда
Разведка маълумотларига кўра, Пхенян баллистик ракета бўлинмаларини ҳам Россия ҳудудига юборишни бошлаган.
Россия ва Шимолий Корея ўртасидаги ҳарбий ҳамкорлик сўнгги икки йил ичида сезиларли даражада кенгайди. Ғарб ва Жанубий Корея разведка хизматлари маълумотларига кўра, 2024 йил кузидан бошлаб Шимолий Корея Россияга 14 мингга яқин ҳарбий хизматчи юборган. Улар асосан Россиянинг Курск вилоятида Украина қўшинларига қарши жангларда қатнашган. Бу ҳақда Reuters хабар берди.
Украина президенти Влaдимир Зеленский июль ойида Россия яна 30 минг нафаргача шимолий кореялик ҳарбийни урушга жалб этишни режалаштираётганини маълум қилган. Жанубий Корея разведкаси ҳам Пхенян қўшимча кучлар юборишга тайёрланаётганини билдирган.
Сўнгги маълумотларга кўра, Шимолий Корея илк бор баллистик ракета бўлинмасини ҳам Россия ҳудудига юборишни бошлаган. Украина ҳарбий разведкаси бу бўлинма олтита ракета учиргичи ва 120 тагача баллистик ракета билан жиҳозланиши мумкинлигини маълум қилган. Бўлинма Россиянинг ғарбий қисмида жойлаштирилиши ва Украинага қарши зарбаларда иштирок этиши кутилмоқда.
Шимолий Корея уруш давомида Россияни катта миқдорда артиллерия снарядлари, ракеталар ва бошқа қурол-аслаҳалар билан ҳам таъминлаб келмоқда. Ғарб давлатлари ва Украина расмийлари бу ёрдам Россияга узоқ давом этаётган урушда қурол-яроғ захираларини тўлдириш имконини бераётганини таъкидлайди.
Маълумот учун, Москва ва Пхенян 2024 йилда ўзаро мудофаа тўғрисидаги шартномани имзолаган. Шундан сўнг икки давлат ўртасидаги ҳарбий ҳамкорлик янада чуқурлашди. Россия 2025 йилда Шимолий Корея ҳарбийлари Курск вилоятидаги жангларда қатнашганини расман тасдиқлаган бўлса, Пхенян ҳам бу иштирокни ўзаро мудофаа мажбуриятлари доирасидаги ҳаракат сифатида баҳолаган.
