Тошкентда вояга етмаган бола дўкондан 6,2 млн сўм ўғирлади
Қўриқлаш хизмати ходимлари уни воқеа жойида ушлаб, пул маблағлари эгасига қайтарилди.
Тошкент шаҳрида вояга етмаган бола дўкондан пул ўғирлагани аниқланди. Бу ҳақда Тошкент шаҳар ИИББ хабар берди.
Маълум қилинишича, вояга етмаган бола дўкон эшиги тирқишидан ичкарига кириб, кассада сақланаётган 6 миллион 185 минг сўмга яқин пул маблағини ўғирлаб кетган.
Ҳодиса тунги хизматни олиб бораётган Қўриқлаш хизмати ходимлари томонидан ўз вақтида аниқланиб, гумонланувчи воқеа жойидан чиқиб кетаётганида қўлга олинган ҳамда ички ишлар органларига топширилган.
Текширув давомида ўғирланган пул маблағлари тўлиқ эгаларига қайтарилган.
Ўрганишлар чоғида мазкур савдо шохобчаси Қўриқлаш хизмати тизимига уланмагани аниқланиб, тадбиркор билан тегишли шартнома тузилган. Шунингдек, ҳудуддаги бошқа савдо объектлари ҳам кўздан кечирилиб, уларнинг эгаларига мулк хавфсизлигини таъминлаш, қўриқлаш хизматига уланиш ва жиноятларнинг олдини олиш бўйича тушунтириш ишлари олиб борилган.
Жиноятни тезкор фош этишда хизмат кўрсатган Қўриқлаш хизмати ходимлари раҳбарият томонидан рағбатлантирилган.
