Тошкентдаги Кичик ҳалқа йўлининг бир қисми 10 августгача ёпилади
Таъмирлаш ишлари давомида автотранспорт воситалари қарама-қарши йўналиш бўйлаб ҳаракатланади, тез тиббий ёрдам машиналари учун эса алоҳида йўлак ташкил этилади.
Тошкент шаҳрининг Чилонзор туманидаги Кичик ҳалқа автомобиль йўлининг Бунёдкор шоҳ кўчаси билан Арнасой кўчаси оралиғидаги қисмида қурилиш-монтаж ишлари олиб борилиши муносабати билан транспорт ҳаракати вақтинча чекланади.
Маълум қилинишича, мазкур участкада аввал йўлнинг қарама-қарши томонида капитал таъмирлаш ва янги асфальт қопламасини ётқизиш ишлари якунланган. Эндиликда таъмирлаш ишлари йўлнинг иккинчи томонида давом эттирилади.
Шу сабабли 6 август соат 23:00 дан 10 август соат 08:00 гача Кичик ҳалқа автомобиль йўлининг Бунёдкор шоҳ кўчаси билан Арнасой кўчаси оралиғидаги таъмирланаётган қисми транспорт ҳаракати учун вақтинча ёпилади.
Бу даврда автотранспорт воситалари оқими йўлнинг қарама-қарши томонига йўналтирилади ва ҳаракат вақтинчалик схема асосида ташкил этилади. Тез тиббий ёрдам машиналари учун эса алоҳида вақтинчалик ҳаракат йўналиши ажратилади.
Масъуллар ҳайдовчилардан йўл белгиларига амал қилиш, тезликни пасайтириш ҳамда ҳаракат йўналишини олдиндан режалаштиришни сўради. Таъкидланишича, чекловлар йўлни сифатли капитал таъмирлаш ва асфальт қопламасини ётқизиш ишларини хавфсиз якунлаш мақсадида жорий этилмоқда.
