Тошкентдаги Миллий боғда 4 ёшли қиз чўкиб вафот этди
Ҳолат юзасидан суд-тиббий экспертиза тайинланиб, суриштирув олиб борилмоқда.
Тошкентдаги Миллий боғ сайилгоҳи ҳудудидаги чўмилиш соҳилида 4 ёшли қиз чўкиб вафот этди. Бу ҳақда Бош прокуратура ахборот хизмати раҳбари Ҳаёт Шамсутдинов маълум қилди.
Ҳодиса 5 август куни соат тахминан 16:30 да Тошкент шаҳридаги Миллий боғ сайилгоҳи ҳудудида жойлашган чўмилиш соҳилида содир бўлган.
Дастлабки маълумотларга кўра, аёл 4 ва 8 ёшли набиралари билан чўмилиш учун мазкур ҳудудга келган. Чўмилиш жараёнида 4 ёшли қиз сувга чўкиб кетган.
Воқеа жойига етиб келган тез тиббий ёрдам ходимлари томонидан болага биринчи тиббий ёрдам кўрсатилган. Бироқ, кўрилган барча саъй-ҳаракатларга қарамай, унинг ҳаётини сақлаб қолишнинг имкони бўлмаган.
Маълум қилинишича, марҳуманинг танасида ташқи тан жароҳатлари аниқланмаган. Ҳодиса юзасидан тергов-тезкор гуруҳи, прокуратура ҳамда Суд-тиббий экспертиза бюроси ходимлари томонидан суд-тиббий экспертиза тайинланган.
Ҳозирда қизнинг ўлим сабабларини аниқлаш мақсадида суриштирув ишлари давом эттирилмоқда.
