Тожикистонда ҳижобга қарши навбатдаги “рейд”лар бошланди

 
Тожикистоннинг Панжакент шаҳрида маҳаллий ҳокимият ва милиция ходимлари ўзлари “бегона кийим” деб атаётган либосларга қарши навбатдаги тушунтириш тадбирларини ўтказди. 4 август куни ҳукмрон Халқ демократик партиясининг Панжакент бўлими эълон қилган фотосуратларга кўра, учрашувлар асосан ҳижоб кийган аёллар ва қизлар иштирокида бўлиб ўтган.

 
Расмийларнинг билдиришича, тадбирдан кўзланган мақсад “бегона маданият кириб келишининг олдини олиш”, миллий ўзликни мустаҳкамлаш ҳамда миллий қадриятларни асрашдан иборат. Бироқ тадбирда неча киши қатнашгани, аёлларга қандай тавсиялар ёки талаблар билдирилгани ҳақида маълумот берилмаган.

 
Radio Ozodi маълумотига кўра, ҳокимият вакиллари билан суҳбатлашган айрим ҳижобли аёллар воқеа тафсилотларини ошкор қилишни истамаган. Улар бу иш жойи ёки шахсий ҳаётида муаммолар келтириб чиқаришидан хавотир билдирган.

 

Қайд этилишича, жорий йил май ойида ҳам Рудакий туманида “Қишлоқдан қишлоққа” номли шунга ўхшаш тарғибот тадбири ўтказилган. Мухолифат вакилларининг таъкидлашича, бу учрашувлар “ихтиёрий тушунтириш ишлари” сифатида тақдим этилган бўлсада, ҳижоб кийган аёллар туман ҳокимияти биносига чақирилган.

 
Маълумот учун, 2024 йил июнь ойидан бошлаб Тожикистонда “миллий маданиятга ёт” деб баҳоланган кийимларни олиб кириш, сотиш, реклама қилиш ва кийиш тақиқланган. Бироқ амалдаги қонунчиликда “бегона кийим” тушунчасига аниқ таъриф берилмаган. Шу билан бирга, амалиётда расмийлар ушбу атама остида асосан исломий кийиниш услуби, хусусан ҳижобни назарда тутаётгани қайд этиб келинади.