Wildberries омборларининг бир қисмини Ўзбекистонга кўчириши мумкин
Шунингдек, компания узоқ муддат сақланадиган маҳсулотларнинг бир қисмини Беларус, Қозоғистондаги омборларга йўналтиришни режалаштирмоқда.
Россиянинг энг йирик маркетплейсларидан бири Wildberries Украина дронлари ҳужумлари ортидан логистика тизимини қайта ташкил этишни бошлади. Компания узоқ муддат сақланадиган маҳсулотларни Беларус, Қозоғистон ва Ўзбекистондаги омборларга йўналтиришни режалаштирмоқда. Бу ҳақда The MoscowTimes хабар берди.
Маълумотларга кўра, Россиядаги омбор қувватларининг қарийб 20 фоизи ҳужумлар оқибатида ишдан чиққан. Шу сабабли компания хавфсизроқ ҳудудлардаги логистика марказларидан фойдаланишни кенгайтиришни кўзламоқда.
Wildberries вакиллари сотувчилар билан ўтказилган учрашувларда узоқ муддатли сақлаш омборлари эндиликда асосан Беларус, Қозоғистон ва Ўзбекистонда жойлашишини, етказиб бериш муддатлари ҳамда логистика харажатлари бўйича қўшимча маълумотлар кейинчалик тақдим этилишини билдирган.
Шу билан бирга, айрим тадбиркорлар янги логистика схемаси етказиб бериш муддатларини узайтириши, транспорт харажатларини ошириши ва божхона расмийлаштируви билан боғлиқ қўшимча муаммоларни келтириб чиқариши мумкинлигини таъкидлашмоқда.
Маълум қилинишича, Wildberries Тошкент вилоятида 170 минг квадрат метр майдонга эга йирик логистика марказини барпо этмоқда. Лойиҳа Россия, Ўзбекистон ва Яқин Шарқ бозорларини боғлаш, шунингдек, Хитой орқали Африка йўналишидаги транзит логистикасини ривожлантиришга хизмат қилиши режалаштирилган.
Мутахассислар ҳисоб-китобига кўра, Россиядаги Wildberries логистика инфратузилмасининг 17–22 фоизи турли даражада зарар кўрган. Компания логистика занжирларини қайта шакллантириш билан бирга, кичик омборлар ва қабул пунктлари тармоғидан кенгроқ фойдаланишни бошлаган.
