Ўзбекистонда пулли автомобиль йўлларини ташкил этиш тартиби белгиланди

 

Ўзбекистонда пулли автомобиль йўлларини қуриш, реконструкция қилиш ва улардан фойдаланишни ташкил этиш тартиби қонун билан белгиланди. Бу ҳақда Адлия вазирлиги хабар берди.

 

Қонунга мувофиқ, автомобиль йўлларини таъмирлаш ва сақлаш ишлари йўл эгалари томонидан, заруратга кўра ихтисослашган йўл ташкилотларини жалб этган ҳолда амалга оширилади.

 

Шунингдек, йирик габаритли ва оғир вазнли транспорт воситаларининг автомобиль йўлларида ҳаракатланишига фақат махсус ваколатли орган ёки унинг тизимидаги идоралар томонидан берилган махсус рухсатнома мавжуд бўлган тақдирда рухсат этилади.

 

Қонунга кўра, пулли автомобиль йўлларини қуриш, реконструкция қилиш ва улардан фойдаланиш тўғрисидаги қарор Ўзбекистон Президенти ёки ўз ваколатлари доирасида Вазирлар Маҳкамаси томонидан қабул қилинади.

 

Бунда пулли йўл ташкил этиш фақат режалаштирилаётган йўл билан боғлиқ ҳудудлар ўртасида фойдаланиш учун қулай ва талаб даражасидаги муқобил бепул автомобиль йўли мавжуд бўлиши шарти билан амалга оширилади.

 

Фойдаланувчилар пулли автомобиль йўлидан фойдаланиш учун оператор билан оммавий шартномани қуйидаги усуллардан бири орқали тузади:

• пулли автомобиль йўлига кириш;

• ҳаракатланиш учун тўловни тўлов пунктида амалга ошириш;

• йўл талонини харид қилиш.

 

Қонунда қайд этилишича, пулли автомобиль йўлларидан фойдаланиш учун тўлов транспорт воситаларининг юқори тезликда ҳаракатланиши ҳамда бутун йўналиш бўйлаб юқори даражадаги сервис хизматларини таъминлаш шарти билан жорий этилади.