“Бўрижар” каналида чўкаётган болани қутқарган ППХ ходими ва фуқаро тақдирланди
Болани қутқаришда жасорат кўрсатган ходим ва фуқаронинг хизматлари эътироф этилиб, уларга пул мукофоти ҳамда эсдалик совғалари топширилди.
Тошкент шаҳар Ички ишлар бош бошқармаси бошлиғи Равшан Султанходжаев иштирокида Яккасарой тумани Ички ишлар органлари фаолиятини мувофиқлаштириш бошқармасида саф йиғилиши бўлиб ўтди. Яккасарой тумани ҳокимлиги матбуот хизмати хабар берди.
Йиғилишда туманда жамоат хавфсизлигини таъминлаш, ҳуқуқбузарликларнинг олдини олиш ҳамда фуқаролар осойишталигини мустаҳкамлаш борасида амалга оширилаётган ишлар муҳокама қилинди.
Тадбир якунида инсон ҳаётини сақлаб қолишда жасорат ва фидойилик кўрсатган фуқаролар муносиб тақдирланди.
Хусусан, «Бўрижар» каналида чўмилиш вақтида чўкаётган 13 ёшли Муҳамадни қутқариб қолган Яккасарой тумани ИИО ФМБ Пост-патруль хизмати инспектори Расул Жўраевнинг тезкор ҳаракати алоҳида эътироф этилди. Шунингдек, қутқарув жараёнида ёрдам кўрсатган фуқаро Зухриддин Эшқувватовнинг жасорати ҳам муносиб баҳоланди.
Уларнинг инсон ҳаётини асраб қолиш йўлидаги фидокорона ҳаракатлари учун Тошкент шаҳар ИИББ бошлиғи Равшан Султанходжаев ҳамда Яккасарой тумани ҳокими Нилуфар Аллабергенова томонидан ташаккурнома, пул мукофоти ва эсдалик совғалари топширилди.
