Европадаги жазирама иқтисодиётга 800 миллиард еврогача зарар етказиши мумкин
Энг йирик молиявий йўқотишлар Францияда кузатилиши мумкин.
Европада кузатилаётган кучли иссиқлик тўлқини иқтисодиёт учун жиддий таҳдидга айланмоқда. EUobserver нашрининг хабар беришича, жазирама оқибатида Европа иқтисодиётига етиши мумкин бўлган умумий зарар 800 миллиард еврога баҳоланмоқда.
Қайд этилишича, ҳаддан ташқари иссиқ об-ҳаво, айниқса очиқ ҳавода фаолият юритувчи қурилиш, қишлоқ хўжалиги ва бошқа тармоқларда меҳнат унумдорлигининг пасайишига сабаб бўлиб, ишчиларни ҳимоя қилиш тизимидаги камчиликларни ҳам юзага чиқармоқда.
Европа атроф-муҳит агентлиги (EEA) мутахассиси Ханс Мартин Фюсселнинг таъкидлашича, экстремал иссиқлик нафақат соғлиқни сақлаш тизими, балки Европа иқтисодиёти ва молия сектори учун ҳам жиддий хавф туғдиради.
Allianz SE таҳлилига кўра, Франция 2030 йилгача ёзги жазирамалар сабаб энг катта иқтисодий йўқотишларга дуч келиши мумкин. Мамлакатда хавф остидаги иқтисодий маҳсулот ҳажми қарийб 240 миллиард долларни ташкил этади. Шунингдек, Италия, Испания ва Германия ҳам катта молиявий йўқотишлар эҳтимоли юқори бўлган давлатлар қаторига киритилган.
Европа иқтисодий зонаси иқлим бўйича мутахассиси Арианна Жаннетти эса кучли иссиқлик тўлқинлари кўплаб тармоқлар учун тизимли хавф туғдираётганини таъкидлаган.
Маълумотларга кўра, июнь ойининг иккинчи ярмида Ғарбий Европанинг қатор ҳудудларида ҳаво ҳарорати 40 даражадан юқори кўтарилган. Copernicus Ер кузатув дастури июнь ойини кузатувлар тарихидаги энг иссиқ ой сифатида қайд этди. Шу билан бирга, Financial Times маълумотига кўра, Европа Иттифоқи давлатлари жорий йилнинг ўзида ўрмон ёнғинларини бартараф этишга 3 миллиард евродан ортиқ маблағ сарфлаган.
