Коттежни ўз номига ўтқизиб, қолган 36 минг долларни бермаган ака-ука ушланди
Улар уйни 66 минг долларга сотиб олишга келишиб, дастлаб 30 минг доллар тўлаган ва қолган пулни беришдан бош тортиб, уй эгасига тазйиқ ўтказиш билан қўрқитган.
Тошкент шаҳрида коттеж савдоси билан боғлиқ товламачилик ҳолати фош этилди. Бу ҳақда Давлат хавфсизлик хизмати маълум қилди.
Аниқланишича, Тошкент шаҳрида яшовчи, 1979 йилда туғилган, муқаддам судланган шахс ҳамда унинг 1988 йилда туғилган укаси ўзаро тил бириктириб, маҳаллий фуқаро томонидан Тошкент туманида қурилган коттежни 66 минг АҚШ долларига сотиб олишга келишган.
Улар дастлаб уй эгасига 30 минг АҚШ доллари тўлаб, қолган 36 минг долларни олти ой ичида беришга ваъда қилган. Шундан сўнг, 2022 йил май ойида коттежни 1976 йилда туғилган акаси номига нотариал тартибда расмийлаштириб олган.
Бироқ кейинчалик ака-ука қолган 36 минг АҚШ долларини тўлашдан бош тортиб, уй эгаси пулни талаб қилган тақдирда унга нисбатан тазйиқ ўтказиш билан қўрқитган.
Давлат хавфсизлик хизмати Тошкент шаҳар бошқармаси ҳамда пойтахт ИИББ ходимлари томонидан ўтказилган тезкор тадбирлар давомида гумонланувчилар қўлга олинган.
Мазкур ҳолат юзасидан уларга нисбатан Жиноят кодексининг 165-моддаси 3-қисми «а» банди (товламачилик) билан жиноят иши қўзғатилиб, тергов ҳаракатлари олиб борилмоқда.
