Маҳаллаларнинг энергетик паспорти яратилади — Энергетика вазири
Энергетика соҳасида истеъмолчиларга мобил илова орқали қарздорлик ва таъминотдаги узилишлар ҳақида маълумот олиш имконини берувчи тизимларни ривожлантириш режалаштирилмоқда.
Янги тайинланган Энергетика вазири Шерзод Хўжаев Президентга энергетика соҳасида амалга оширилиши режалаштирилган устувор вазифалар юзасидан тақдимот ўтказилгани ҳақида маълум қилди.
Вазирнинг таъкидлашича, йиғилишда энергетика соҳасидаги ишларни маҳаллабай ташкил этиш ва ҳар бир маҳалланинг энергетик паспортини шакллантириш асосий вазифалардан бири сифатида белгиланган.
Энергетик паспортда маҳалладаги истеъмолчилар сони ва тоифалари, электр энергияси ҳамда табиий газ инфратузилмасининг мавжуд ҳолати, уни таъмирлаш ва модернизация қилиш учун зарур маблағ ва муддатлар, шунингдек, янги истеъмолчиларни тармоққа улаш имкониятлари акс эттирилади. Имконият етарли бўлмаган ҳудудларда инфратузилмани кучайтириш ва кенгайтириш бўйича зарур чоралар ҳам белгиланади.
Шунингдек, электр энергияси ва табиий газ етказиб берувчи ташкилотлар билан истеъмолчилар ўртасидаги мулоқотни янги босқичга олиб чиқиш вазифаси қўйилган.
Бунинг учун онлайн платформаларни ишга тушириш, уларни ахборот ва биллинг тизимлари билан интеграция қилиш режалаштирилмоқда. Натижада аҳоли ва тадбиркорлар мобил илова орқали қарздорлик ва бошқа маълумотларни исталган вақтда олиш, шунингдек, таъминотдаги узилишлар ҳақида масофадан туриб хабар бериш имкониятига эга бўлади.
Мобил иловалардан фойдалана олмайдиган фуқаролар учун эса қўнғироқлар марказлари фаолиятини қайта кўриб чиқиш, уларнинг имкониятларини кенгайтириш ҳамда мурожаатларга жавоб бериш тезлиги ва сифатини ошириш кўзда тутилмоқда.
Энергетика тизимидаги электр энергияси ва табиий газ йўқотишлари ҳамда қарздорликларни кескин камайтириш ҳам устувор вазифалар қаторидан ўрин олган. Бу йўналишда рақамли технологиялар ва сунъий интеллектдан фойдаланиб, соҳа ходимлари фаолиятини мониторинг қилиш, кунлик вазифаларни белгилаш, ҳисоботларни таҳлил қилиш ва хавф-хатарларни олдиндан аниқлаш тизимини кучайтириш режалаштирилмоқда.
Шунингдек, тармоқларда авариялар ва узилишларнинг олдини олиш учун муаммоли ҳудудларни олдиндан аниқлаш, зарур ҳолларда қувватларни ошириш ва инфратузилмани модернизация қилиш чоралари кўрилади.
Энергетика соҳасида таннархни пасайтириш мақсадида рақобат муҳитини ривожлантириш ва бозор механизмларидан фойдаланишни жадаллаштириш ҳам кўзда тутилган.
Хусусан, суюлтирилган газнинг эркин бозорини шакллантириш бўйича топшириқ берилган. Бунда тадбиркорларнинг хориждан суюлтирилган газ импорт қилиши ва уни аҳоли ҳамда тадбиркорлик субъектларига сотиш жараёнларини соддалаштириш, қўшимча қулайликлар яратиш билан бирга, хавфсизлик талабларини таъминлаш мақсадида амалдаги техник регламентларни қайта кўриб чиқиш белгиланган.
