Олмаотада инсультни бошдан кечирган ўзбекистонлик аёл ватанга қайтарилди
Аёлга Қозоғистон фуқароси томонидан яшаш жойи, озиқ-овқат, кийим-кечак ва ҳужжатларни расмийлаштиришда бепул кўмак берилган.
Ўзбекистоннинг Олмаотадаги Бош консуллиги кўмагида Қозоғистонда меҳнат фаолиятини олиб бораётган вақтида инсультни бошдан кечирган аёл Ўзбекистонга қайтарилди. Бу ҳақда Dunyo ахборот агентлиги хабар берди.
Маълум қилинишича, фуқаронинг мурожаати ва унинг оғир саломатлик ҳолати инобатга олиниб, Бош консуллик томонидан Ўзбекистонга қайтиши учун қайтиш сертификати расмийлаштирилган ҳамда Олмаота–Тошкент йўналиши бўйича авиачипта харид қилишда амалий ёрдам кўрсатилган.
Шунингдек, Қозоғистоннинг ваколатли ҳуқуқни муҳофаза қилувчи ва миграция органлари билан ҳамкорликда ўзбекистонлик фуқаронинг мамлакатдан қонуний тартибда чиқиб кетиши таъминланган.
Мазкур жараёнда Қозоғистон фуқароларидан бири аёлга бепул ёрдам кўрсатиб, уни вақтинча яшаш жойи, кийим-кечак ва озиқ-овқат билан таъминлагани, зарур ҳужжатларни расмийлаштириш ҳамда бошқа ижтимоий-маиший масалаларни ҳал этишда кўмаклашгани учун Бош консуллик унга миннатдорлик билдирган
