Самарқандда юк машинаси ағдарилиб кетди, ҳайдовчи ҳалок бўлди
Юк машинаси кабинасида ёнғин чиқиши ортидан ҳайдовчи бошқарувни йўқотиб, бетон тўсиққа урилган
6 август куни соат 16:00 атрофида Самарқанд вилоятининг Нуробод туманидаги А-378 автомобиль йўлининг 35-километрида оғир йўл-транспорт ҳодисаси содир бўлган. Вилоят Йўл ҳаракати хавфсизлиги бошқармаси маълумотига кўра, МАN русумли юк автомобили Самарқанд–Қашқадарё йўналиши бўйлаб ҳаракатланаётган вақтда транспорт воситаси кабинасининг салон қисмида тўсатдан ёнғин келиб чиққан.
Ҳайдовчи автомобилни тўхтатишга уринган, бироқ бошқарувни йўқотган. Оқибатда юк машинаси йўлнинг чап томонидаги бетон тўсиққа урилиб, ағдарилиб кетган.
Ҳодиса оқибатида ҳайдовчи оғир тан жароҳатлари олиб, воқеа жойининг ўзида вафот этган.
Мазкур ҳолат юзасидан Нуробод тумани ИИБ Тергов бўлими томонидан жиноят иши қўзғатилган. Ҳозирда ҳодисанинг келиб чиқиш сабаблари ва барча ҳолатларни аниқлаш бўйича тергов ҳаракатлари давом эттирилмоқда.
