Саудия Арабистони, Туркия ва Покистон қўшма мудофаа келишувини имзолади
Томонлар бир давлатга қарши қуролли ҳужумни учаласига қарши ҳужум сифатида кўришга келишди.
Саудия Арабистони, Туркия ва Покистон ўртасида жамоавий мудофаа ва ҳарбий ҳамкорликни мустаҳкамлашга қаратилган қўшма мудофаа келишуви имзоланди.
Келишув Жидда шаҳрида Саудия Арабистони валиаҳд шаҳзодаси Муҳаммад бин Салмон, Туркия президенти Ражаб Тоййиб Эрдўған ва Покистон бош вазири Шаҳбоз Шариф иштирокидаги учрашувлар доирасида тузилди.
Ҳужжатга кўра, уч давлатдан бирига уюштирилган қуролли ҳужум барча аъзо давлатларга қарши ҳужум сифатида баҳоланади. Шу орқали томонлар ўзаро хавфсизлик ва мудофаа соҳасидаги ҳамкорликни янги босқичга олиб чиқишни мақсад қилган.
Келишув доирасида ҳарбий ҳамкорликни кенгайтириш, хавфсизлик масалаларида ўзаро мувофиқлаштиришни кучайтириш ҳамда умумий таҳдидларга қарши ҳамкорликда ҳаракат қилиш кўзда тутилмоқда.
Келишувнинг имзоланиши Яқин Шарқ ва Форс кўрфази минтақасида ҳарбий-сиёсий кескинлик кучайиб бораётган бир пайтга тўғри келмоқда. Минтақадаги сўнгги воқеалар уч давлат ўртасидаги хавфсизлик бўйича музокараларни жадаллаштирган.
Саудия Арабистони ва Покистон ўртасидаги мудофаа алоқалари 2025 йилда имзоланган стратегик мудофаа келишувидан кейин янада мустаҳкамланган эди. Янги уч томонлама келишув эса Анқара, Ар-Риёд ва Исломобод ўртасидаги хавфсизлик ҳамкорлигини кенгайтириши кутилмоқда.
