Сунъий интеллект ёрдамида табиатда учрамайдиган вируслар яратилди

 
АҚШ олимлари сунъий интеллектдан фойдаланиб, табиатда мавжуд бўлмаган 16 та янги вирус яратишга муваффақ бўлди. Бу ҳақда AlJazeera хабар берди.

 

Тадқиқотни Стенфорд университети ва Arc Institute олимлари амалга оширган. Улар Evо 1 ва Evо 2 номли сунъий интеллект моделларидан фойдаланиб, табиатда учрамайдиган минглаб вирус геномларини лойиҳалаштирган. Лаборатория синовларида улардан 16 таси функционал экани тасдиқланиб, E.coli бактерияларини юқтириш ва йўқ қилиш қобилиятини намойиш этган.

 
Яратилган вируслар бактериофаглар бўлиб, улар фақат бактерияларни зарарлайди ва одамларга хавф туғдирмайди. Олимлар бундай технология антибиотикларга чидамли инфекцияларни даволаш, индивидуал бемор учун мос бактериофагларни тез яратиш ҳамда янги биологик терапияларни ишлаб чиқишда муҳим аҳамият касб этишини таъкидламоқда.

 
Шу билан бирга, биохавфсизлик бўйича мутахассислар сунъий интеллектнинг вирус геномларини яратиш имконияти келажакда зарарли мақсадларда ҳам қўлланиши мумкинлигидан хавотир билдирмоқда. Уларнинг фикрича, бундай технологиялар ривожланиши билан назорат механизмлари, ДНК синтези устидан мониторинг ва халқаро хавфсизлик қоидаларини кучайтириш зарурати ортмоқда.

 
Тадқиқот муаллифлари эса лойиҳа давомида фақат одамларга хавф туғдирмайдиган бактериофаглар билан ишланганини, барча тажрибалар биохавфсизлик талабларига мувофиқ ўтказилганини билдирган. Уларнинг айтишича, сунъий интеллект биология ва тиббиётда янги имкониятлар яратиши мумкин, бироқ ундан фойдаланиш қатъий назорат ва халқаро ҳамкорликни талаб қилади.