Тошкентда аёлнинг интим суратларни тарқатмаслик эвазига 3 минг доллар талаб қилган эркак ушланди
У суратларни аёлнинг оила аъзоларига кўрсатиш ва тарқатиш билан таҳдид қилиб, пул талаб қилган.
Тошкент шаҳрида аёлнинг шахсий фото ва видеоларини тарқатиб юбориш ҳамда уларни оила аъзоларига кўрсатиш билан таҳдид қилиб, ундан пул талаб қилган шахс қўлга олинди. Бу ҳақда Ички ишлар вазирлиги матбуот хизмати хабар берди.
Маълум қилинишича, 1999 йилда туғилган аёл ички ишлар органларига мурожаат қилиб, 1995 йилда туғилган эркак унинг турли вақтларда олинган интим фото ва видеоларини тарқатмаслик, шунингдек, оила аъзоларига кўрсатиб шарманда қилмаслик эвазига ундан қарийб 3 минг АҚШ доллари талаб қилиб келаётганини билдирган.
Мурожаат асосида ички ишлар органларининг Тезкор қидирув департаменти ва ҳудудий бўлинмалари ходимлари томонидан тезкор тадбир ўтказилган.
Тадбир давомида гумонланувчи Тошкент шаҳрининг Миробод туманида аёлдан талаб қилган 3 минг АҚШ долларини олаётган вақтида ашёвий далиллар билан ушланган.
Мазкур ҳолат юзасидан унга нисбатан Жиноят кодексининг 165-моддаси 1-қисми (товламачилик) билан жиноят иши қўзғатилган. Ҳозирда тергов ҳаракатлари олиб борилмоқда.
