Трамп АҚШда “туғилиш туризми”га чек қўйди

 

АҚШ президенти Доналд Трамп мамлакатга фарзанд туғиш мақсадида келиб, чақалоқнинг туғилиши орқали автоматик равишда АҚШ фуқаролигини олиш амалиёти — “туғилиш туризми”ни тақиқловчи фармонни имзолади.

 

Бу ҳақда Оқ уй аппарати раҳбари ўринбосари Стивен Миллер фармон имзоланиши маросимида маълум қилди.

 

Трампнинг сўзларига кўра, айрим шахслар АҚШда туғилиш орқали фуқаролик олиш имкониятидан тижорий мақсадларда фойдаланмоқда. Президент бундай амалиёт “шундай ишлаши керак эмаслиги”ни таъкидлаган.

 

Фармон, шунингдек, туғилиш орқали автоматик фуқаролик олиш ҳуқуқига эга бўлмайдиган шахслар доирасини кенгайтиради. Унга кўра, АҚШнинг хорижий душманлари, хорижий террористик ташкилотлар аъзолари ҳамда айрим хорижий ҳукуматлар номидан фаолият юритувчи шахсларнинг фарзандларига нисбатан фуқаролик бериш тартибига чекловлар қўйилади.

 

Оқ уй маълумотларига кўра, янги чора АҚШга айнан фарзанд туғиш ва унинг орқали фуқаролик олиш мақсадида келиш амалиётига қарши қаратилган.

 

Бундан ташқари, Трамп туғилиш орқали фуқаролик масаласига оид яна бир фармонни имзолаган. Унда айрим тоифадаги шахсларнинг фарзандлари туғилишнинг ўзи билан автоматик равишда АҚШ фуқаролигини олмаслиги назарда тутилган.

 

АҚШ Олий суди аввалроқ Трамп маъмуриятининг туғилиш орқали фуқароликни чеклашга қаратилган сиёсати юзасидан қарорлар чиқарган. Шу сабабли янги фармонлар ҳам ҳуқуқий баҳсларга сабаб бўлиши кутилмоқда.

 

АҚШда туғилиш орқали фуқаролик олиш ҳуқуқи мамлакат Конституциясининг 14-тузатмаси билан боғлиқ бўлиб, Трамп маъмурияти мазкур тартибни қайта кўриб чиқишни ўз сиёсий кун тартибининг муҳим йўналишларидан бири сифатида илгари сурмоқда.