Туркиялик олимнинг Ўзбекистон ҳақидаги китоби нашр этилди
Кемал Явуз Атаманнинг 1991 йилдан буён Ўзбекистондаги кузатувлари ва тадқиқотлари жамланган “Мен таниган Ўзбекистон” асари ўзбек ва турк тилларида тақдим этилди.
Ўзбекистон мустақиллигининг 35 йиллиги муносабати билан туркиялик олим Кемал Явуз Атаманнинг “Мен таниган Ўзбекистон” китоби нашр этилди.
Нашр Республика Маънавият ва маърифат маркази, “Маърифат” тарғиботчилари жамияти ҳамда Ижтимоий-маънавий тадқиқотлар институти ҳамкорлигидаги “Маърифат элчилари” лойиҳаси доирасида ўзбек ва турк тилларида тайёрланган.
Китобда муаллифнинг 1991 йилдан буён Ўзбекистонга қилган сафарлари, илмий экспедициялари, архив тадқиқотлари ва маҳаллий аҳоли билан мулоқотлари асосида шаклланган кузатувлари жамланган.
Асарда Янги Ўзбекистонда амалга оширилаётган ислоҳотлар, мамлакат тараққиёти, маданий мерос ва миллий қадриятлар, шунингдек, Ўзбекистоннинг халқаро майдондаги ўрни хорижлик олим нигоҳи орқали ёритилган.
Китоб тақдимотида давлат ва жамоат ташкилотлари вакиллари, олимлар, академиклар, зиёлилар, ёзувчи ва таржимонлар, дипломатик корпус, ОАВ вакиллари, талабалар ҳамда жамоатчилик иштирок этди.
