Қувайт мамлакатдаги ягона Эрон мактабини ёпди
Расмий сабаб очиқланмаган бўлса-да, қарор минтақадаги кескин геосиёсий вазият фонида қабул қилингани қайд этилмоқда.
Қувайт Таълим вазирлиги мамлакатдаги ягона Эрон мактаби фаолиятини тўхтатиш ҳамда унинг таълим лицензиясини бекор қилиш тўғрисида қарор қабул қилди. Бу ҳақда AFP агентлиги вазирликдаги манбага таяниб хабар берди.
Маълум қилинишича, мазкур қарор ортидан мактабга янги ўқувчиларни қабул қилиш тўхтатилган, ота-оналарга эса фарзандларини бошқа таълим муассасаларига ўтказиш тавсия этилган.
Расмий ҳужжатда мактабнинг ёпилиш сабаблари очиқланмаган. Бироқ AFP манбаларига кўра, қарор Эрон ва минтақадаги давлатлар ўртасидаги кескинлик кучайган, шунингдек, АҚШ ҳарбийлари жойлашган Форс кўрфази давлатларига қилинган ҳужумлар фонида қабул қилинган.
Қувайт расмийлари ушбу қарор юзасидан қўшимча изоҳ бермаган.
