2026 йил июль ойи Ўзбекистонда рекорд даражадаги энг иссиқ ойлардан бири бўлди
Ҳаво ҳарорати меъёрдан 1,3–2,8°C юқори бўлиб, айрим ҳудудларда ҳарорат 50°C гача кўтарилган.
Ўзгидромет маълумотига кўра, 2026 йил июль ойида Ўзбекистонда ҳаво ҳарорати иқлимий меъёрлардан сезиларли даражада юқори бўлди. Ҳудудларнинг катта қисмида ўртача ойлик ҳарорат меъёрдан 1,3–2,3°C, шимолий ва чўл ҳудудларининг айрим жойларида эса 2,5–2,8°C юқори қайд этилди.
Ойнинг дастлабки кунлари нисбатан салқин кечиб, кундузги ҳарорат 27–32°C атрофида бўлган. Июль ойининг иккинчи беш кунлигидан бошлаб ҳаво ҳарорати кескин кўтарилиб, 18–19 июль кунлари Ўзбекистоннинг катта қисмида иссиқлик энг юқори даражага етган.
Ушбу кунларда ҳаво ҳарорати аксарият ҳудудларда 43–45°C, жанубий ва чўл ҳудудларида эса 46–50°C гача кўтарилган. Айрим ҳудудларда максимал ҳарорат бўйича янги рекордлар қайд этилган.
Тошкент шаҳрида энг юқори ҳарорат 19 июль куни кузатилиб, 44,3°C ни ташкил этган. Бу пойтахтда 1997 йил 18 июлда қайд этилган мутлақ максимал кўрсаткичдан атиги 0,3°C паст.
Иссиқ кунларда тунлари ҳам ҳарорат юқори бўлиб, айрим ҳудудларда минимал ҳарорат 30–33°C гача етган.
40°C ва ундан юқори ҳарорат кузатилган кунлар сони марказий ва шарқий ҳудудларда 3–8 кунни, республиканинг бошқа ҳудудларида 9–18 кунни, жанубнинг айрим ҳудудлари ва Қизилқум чўлида эса 19–23 кунни ташкил этган. Бу кўрсаткичлар узоқ йиллик ўртача қийматлардан анча юқори.
Июль ойида ёғингарчилик миқдори бўйича ҳам айрим ҳудудларда ноодатий ҳолат кузатилган. Хоразм, Бухоро, Навоий, Қашқадарё ва Сурхондарё вилоятларида ой давомида асосан қуруқ об-ҳаво ҳукм сурган.
