АҚШ Россия ва Эронга қарши санкцияларни кучайтирилиши мумкин
Тегишли қонун лойиҳаси Сенат томонидан маъқулланди.
АҚШ Сенати Россия ва Эронга қарши санкцияларни кучайтиришга қаратилган қонун лойиҳасини маъқуллади. Ҳужжат Россия энергетика ресурсларини харид қилаётган мамлакатларга нисбатан қўшимча тарифлар жорий этиш имконини беради. Бу ҳақда Reuters хабар берди.
Сенатдаги овоз бериш жараёни палатанинг расмий сайти орқали намойиш этилди. Эндиликда қонун лойиҳаси АҚШ Вакиллар палатасида кўриб чиқилиши кутилмоқда.
Ҳужжатга кўра, АҚШ Россиядан нефть, уран ва табиий газ сотиб олувчи мамлакатлардан импорт қилинадиган айрим товарларга 100 фоизгача тариф жорий этиши мумкин. Шунингдек, АҚШ президентига Россия товарларига нисбатан 500 фоизгача бож белгилаш ваколати берилиши назарда тутилган.
Қонун лойиҳасида Эронга қарши амалдаги санкцияларни 2031 йилгача узайтириш ҳам кўзда тутилган. Бундан ташқари, Эрон билан бизнес юритувчи АҚШдан ташқаридаги компанияларга нисбатан иккиламчи санкциялар қўллаш имконияти ҳам белгиланмоқда.
Сенатдаги мазкур ташаббус Россиянинг энергетика экспортидан тушадиган даромадларини чеклаш ҳамда Эрон билан иқтисодий алоқаларни қисқартиришга қаратилган.
Шу билан бирга, қонун лойиҳаси ҳали якуний кучга кирган эмас. У Вакиллар палатасида ҳам кўриб чиқилиши ва кейинги қонунчилик жараёнларидан ўтиши керак.
