АҚШ тарихида биринчи марта мусулмон эркак сенатор бўлиши мумкин
41 ёшлик Абдул Эл-Саед Мичиганда Сенат учун праймеризда ғалаба қозонди.
Associated Press ахборот агентлиги ва бошқа етакчи ОАВлар сайлов участкалари ёпилганидан 12 соат ўтиб, чоршанба куни Эл-Саеднинг тор доирадаги шиддатли пойгада ғалаба қозонганини эълон қилди. Деярли барча овозлар санаб чиқилгач, Эл-Саед 1 фоизлик устунлик билан ғалабага эришган. У исроилпараст гуруҳлар томонидан амалга оширилган 60 миллион АҚШ доллардан ортиқ сайлов компанияси харажатларига қарамай ғалаба қозонган. У АҚШ Сенати учун Демократик партиядан номзодликни қўлга киритган.
Сешанба куни бўлиб ўтган овоз бериш натижалари Эл-Саедни мағлуб этиш ҳаракатларига бош-қош бўлган ҳамда унинг рақиби — АҚШ Конгресси аъзоси Ҳейли Стивенсни 30 миллион доллардан ортиқ маблағ билан қўллаб-қувватлаган Америка-Исроил жамоатчилик билан алоқалар қўмитасига (AIPAC) жуда оғир зарба бўлди.
Ноябрь ойидаги сайловда Эл-Саед собиқ республикачи конгрессмен Майк Рожерс билан куч синашади. Ушбу пойга ноябрдаги оралиқ сайловларнинг энг шиддатли кечадиган Сенат ўринларидан бири деб ҳисобланмоқда ва президент Доналд Трампнинг қолган ваколат муддати давомида палатани қайси партия назорат қилишини белгилаб бериши мумкин.
Келиб чиқиши мисрлик бўлган Эл-Саед ноябрда ғалаба қозонса, АҚШ тарихидаги биринчи мусулмон сенаторга айланади.
2024 йилда Трампга овоз берган «тебранувчи» (swing state) Мичиган штатидаги сешанба кунги натижа Демократик партиянинг Яқин Шарқдаги низоларга нисбатан юритадиган сиёсатига катта таъсир кўрсатади.
Эл-Саед Исроилнинг Ғазодаги хатти-ҳаракатларини геноцид деб тан олади ва Исроил манфаатларига хизмат қиладиган можароларга сарфланаётган маблағлар АҚШдаги маҳаллий жамоаларга — соғлиқни сақлаш, уй-жой ва инфратузилма муаммоларини ҳал қилишга йўналтирилиши керак деб ҳисоблайди.
Номзодларни қўллаб-қувватламайдиган мустақил “Араб-Америка институте” ижрочи директори Мая Берри Эл-Саеднинг ғалабасини “жуда муҳим воқеа” деб атади.
Унинг таъкидлашича, сайловчилар сиёсат ҳақида гапирмасдан, фақат “Абдул исмли араб-америкалик мусулмон эркак” ҳақида салбий ҳужумларга тўла рекламалар селига «учишмади».
“Мамлакатнинг қолган қисми Мичиган бу каби босимларга таслим бўлмаслигини билиб олганидан жуда хурсандман”, — деган Берри Al Jazeera’га.
Трамп Эл-Саеднинг ғалабаси республикачилар учун «ажойиб хабар» эканини айтди.
“Яҳудийлар ва Исроилни ёмон кўрадиган коммунист омадсиз Эл-Саед Социалист билан бўлган пойгада тахминий ғолиб бўлди”, — деб ёзди АҚШ президенти ижтимоий тармоқдаги саҳифасида.
“Одатдагидек, сўровномалар бу сафар ҳам жуда кўп хато қилди. У (Стивенс) бунчалик яхши натижа кўрсатиши кутилмаганди. Энди дем-аҳмоқларнинг (Думосратс) тентакча сиёсати янада ёмонлашади!”
