"Бизга бошқа театр керак эмас" — Ғолибаф Трампга
Эрон парламенти спикери Трампни таҳдидларни тўхтатиб, Эрон билан боғлиқ мажбуриятларини бажаришга чақирди.
Эрон парламенти спикери Муҳаммад Боғир Ғолибаф АҚШ президенти Дональд Трампни таҳдидлар ва қарама-қарши баёнотлар беришни тўхтатиб, Эрон билан боғлиқ мажбуриятларини бажаришга чақирди.
Ғолибафнинг таъкидлашича, қўрқитиш, ваъдаларни бузиш ва ёлғон ахборотдан босим воситаси сифатида фойдаланиш муваффақиятсиз стратегиядир. У Трампнинг Эрон ҳудудига янги зарбалар бериш ҳақидаги таҳдидлари ҳамда музокараларга тайёрлиги ҳақидаги баёнотларини «такрорланувчи театр дипломатияси» деб атаган.
Аввалроқ Трамп АҚШнинг Эронга қарши ҳарбий операцияси тез орада якунланиши мумкинлигини билдирган ва томонлар ўртасида музокаралар бораётганини айтган эди. Шу билан бирга, у Эрон Ҳурмуз бўғозини очмаса, АҚШ томонидан кучли зарба берилиши мумкинлиги ҳақида огоҳлантирган.
