Эрон АҚШ билан келишувга тайёр эди — Пезешкиан

 

Эрон президенти Масуд Пезешкиан Теҳрон уруш ва кескинликни истамаслигини, бироқ Яқин Шарқдаги АҚШ ҳарбий базаларидан ҳужум уюштирилган тақдирда мамлакат ўзини ҳимоя қилиш ҳуқуқини сақлаб қолишини маълум қилди.

 

Пезешкианнинг таъкидлашича, Эрон ва АҚШ ўртасидаги музокараларда муҳим келишув лойиҳаси бўйича асосий масалалар амалда келишиб олинган. Ҳужжатга қўшимча қонунийлик бериш мақсадида уни АҚШ президенти Доналд Трамп шахсан имзолаши кутилган.

 

Бироқ Эрон президентининг сўзларига кўра, музокаралар жараёни 24 соатдан кам вақт ичида кескин ўзгарган ва якуний келишувга эришилмаган. Пезешкиан келишув дастлаб Эрон раҳбарияти томонидан маъқулланганини таъкидлаган.

 

Эрон президенти мамлакат минтақада уруш ёки бошқа давлатларга ҳукмронлик қилишни мақсад қилмаганини қайд этган. Унинг фикрича, Ислом Республикасига нисбатан ташқи босим ва таҳдидлар тўхтатилса, минтақадаги кескинликни бартараф этиш учун шароит яратилади.

 

Шунингдек, Пезешкиан ҳукумат ва ҳарбийлар ўртасида келишмовчиликлар мавжудлиги, ҳукумат ичида бўлиниш юзага келгани ҳамда унинг истеъфога чиқиши мумкинлиги ҳақидаги хабарларни рад этган.

 

У Эрон ўз ҳуқуқларини қуролли қарама-қаршиликдан кўра, музокаралар орқали таъминлашни афзал кўришини билдирган.