Президент “Янги Ўзбекистон бунёдкорлари” танлови ғолибларини табриклади
Танловнинг уч босқичида 124 мингдан зиёд ёш иштирок этиб, якунда 10 та касб йўналиши бўйича 120 нафар ғолиб ва совриндор аниқланди.
Президент Шавкат Мирзиёев “Янги Ўзбекистон бунёдкорлари” касбий маҳорат миллий танлови ғолиб ва совриндорларини табриклади.
Давлат раҳбари мурожаатида замонавий иқтисодиёт, рақамли технологиялар ва янги корхоналар ўз касбининг устаси бўлган, рақобатбардош мутахассисларни тайёрлаш ва рағбатлантиришни талаб этаётганини таъкидлади.
Илк бор Президент соврини учун ташкил этилган танлов уч босқичда ўтказилган. Унинг дастлабки — туман ва шаҳар босқичида 124 минг нафардан зиёд ёш иштирок этган. Ҳудудий босқичда эса қарийб 7 минг нафар иштирокчи қатнашган бўлиб, уларнинг 3,5 минг нафари ўзини ўзи банд қилган маҳалла ёшлари бўлган.
Танлов жараёнида 22 минг нафар ёш учун ишлаш, таълим олиш ёки меҳнат бозорида ўз ўрнини топиш имконияти яратилган.
Шунингдек, қарийб 8,9 минг нафар иштирокчига ишга жойлашиш учун йўлланмалар берилган, 4 470 нафар ёш техникумларда ўқиш учун тавсия этилган. Чет элда ишлашни режалаштирган 8 340 нафарга яқин ёш хорижий иш берувчилар танловларига йўналтирилган. Танлов якунида 10 та касб йўналишида 120 нафар иштирокчи ғолиб ва совриндор деб топилган.
Шавкат Мирзиёев ғолиблар ва юқори натижа кўрсатган иштирокчилар орасидан Ўзбекистон терма жамоасини шакллантириб, уларни WorldSkills International халқаро танловига тайёрлаш зарурлигини таъкидлади.
Бунинг учун энг кучли маҳаллий ва хорижий мутахассисларни жалб этиш, жамоани замонавий ускуналар ва ўқув-машқ базаси билан таъминлаш режалаштирилган.
Президент ёшларни янги билим ва технологияларни эгаллаш, хорижий тилларни ўрганиш ҳамда ўз касби бўйича илғор мутахассис бўлишга чақирди.
