Россия яқин ҳафталарда НАТО давлатларидан бирига зарба бериши мумкин
Разведка ҳисоботида Россиянинг бундай ҳаракати куз ойларидан 2029 йилгача бўлган даврда юз бериши мумкинлиги қайд этилган.
The Telegraph хабарига кўра, АҚШ разведка идоралари Россия президенти Владимир Путин яқин ҳафталарда ёки куз ойларидан бошлаб НАТОга аъзо давлатлардан бирига нисбатан чекланган ҳарбий ёки гибрид характердаги провокация уюштириши мумкинлигини истисно қилмаяпти. Разведка ҳисоботида бундай ҳаракатнинг асосий мақсади альянснинг бирдамлиги ва Шимолий Атлантика шартномасининг 5-моддаси амалда қандай ишлашини синаб кўриш бўлиши мумкинлиги айтилган.
Ҳисоботда эҳтимолий сценарийлар қаторида НАТО ҳудудига кичик кўламли қуруқликдан кириб бориш, муҳим инфратузилмага қарши киберҳужумлар, номаълум қуролли гуруҳлар орқали амалга ошириладиган гибрид операциялар ҳамда Россия билан боғлиқлиги расман инкор этилиши мумкин бўлган бошқа провокациялар тилга олинган. АҚШ разведкаси бундай ҳаракатлар тўлиқ уруш бошлашдан кўра, НАТОнинг сиёсий ва ҳарбий бирлик даражасини текширишга қаратилган бўлиши мумкинлигини баҳолаган.
Нашрнинг ёзишича, разведка баҳолаши Россиянинг сўнгги ойларда НАТО шарқий қаноти яқинидаги фаоллиги ортгани фонида тайёрланган. Литва махсус хизматлари Москва қўлга киритилган Украина дронларидан фойдаланиб, Болтиқбўйи давлатларида «сохта байроқ» операцияларини уюштириши мумкинлиги ҳақида огоҳлантирган. Польша ва бошқа НАТО давлатлари ҳам Россия томонидан эҳтимолий саботаж ва гибрид таҳдидлар юзасидан хавотир билдирган.
Шу билан бирга, The Wall Street Journal маълумотларига кўра, АҚШ разведкаси бундай сcенарий куз ойларидан 2029 йилгача бўлган даврда юз бериши мумкинлигини баҳоламоқда. Ҳисоботда аниқ давлат ёки ҳужум санаси кўрсатилмаган. Разведка идоралари буни Россия кўриб чиқаётган эҳтимолий вариантлардан бири сифатида баҳолаган.
