Тошкентда ҳаво транспортида хавфсизликни таъминлаш бўйича ўқув машғулоти ўтказилди

Тошкент халқаро аэропорти ташаббуси билан авиация қидирув-қутқарув хизматларининг фавқулодда вазиятларга тайёргарлигини синовдан ўтказишга қаратилган кенг кўламли ўқув машғулоти ташкил этилди. Бу ҳақда “Zamon” информацион-таҳлилий дастурида хабар берилди.

 

Маълум қилинишича, машғулот Мудофаа вазирлигига қарашли Десантларни қайта тайёрлаш марказида ўтказилди. Сценарийга кўра, ҳудудда ҳаво кемаси ҳалокатга учрагани ҳақида шартли сигнал берилди.

 

Сигнал келиб тушгач, Тошкент халқаро аэропортининг қидирув-қутқарув гуруҳи белгиланган ҳудудга 10 дақиқа ичида йиғилди. Шунингдек, воқеа жойига  Тошкент вилояти Фавқулодда вазиятлар бош бошқармаси, ёнғин ўчириш техникалари, Ички ишлар бош бошқармаси тезкор қидирув гуруҳи, тез тиббий ёрдам ходимлари жўнатилди.

 

Ўқув машғулоти давомида шартли ҳалокат ҳудудида қидирув-қутқарув ишлари олиб борилди, жабрланганлар хавфсиз ҳудудга эвакуация қилинди ва уларга биринчи тиббий ёрдам кўрсатилди. Шунингдек, шартли ёнғинни бартараф этиш, воқеа жойини хавфсизлик назоратига олиш ҳамда турли хизматларнинг ўзаро ҳамкорлиги амалий тарзда синовдан ўтказилди.

 

Ташкилотчиларнинг таъкидлашича, машғулотда олтита бўлинма режа-жадвал асосида ҳаракатга келтирилган. Шартли жабрланганлар қутқарилиб, уларга тиббий ёрдам кўрсатилган ва шифохонага етказилган.

 

Мутахассислар бундай комплекс машғулотлар фавқулодда вазиятларда тезкор қарор қабул қилиш, қидирув-қутқарув ишларини самарали ташкил этиш ҳамда турли идоралар ўртасидаги ҳамкорликни кучайтиришга хизмат қилишини қайд этмоқда.

 

Қидирув-қутқарув хизматларининг амалий тайёргарлигини ошириш ва юз бериши мумкин бўлган фавқулодда вазиятларда ҳаракатларнинг доимий шайлигини таъминлаш мақсадида бундай машғулотларни мунтазам ўтказиш режалаштирилган.