Тошкентда “закладка” усулида наркотик тарқатган шахслар ушланди
Тезкор тадбирлар давомида 3 килограммдан ортиқ наркотик моддалар аниқланган.
“Тинч ва соғлом юрт” тезкор-профилактик тадбирлари доирасида Давлат хавфсизлик хизмати ва божхона органлари ходимлари томонидан Тошкент шаҳрининг Сергели туманида наркотик моддалар ноқонуний айланишига қарши тезкор тадбир ўтказилди.
Тадбир давомида 1993 йилда туғилган фуқаронинг автомобили ва яшаш хонадони холислар иштирокида кўздан кечирилганда 1,1 килограмм «Альфа-ПВП», 1,9 килограмм марихуана, 65 грамм героин ва 16 грамм «5Ф-АПИНАСА» моддаси, шунингдек, наркотикларни қадоқлашда фойдаланилган зип-пакетлар ва электрон тарози ашёвий далил сифатида олинган.
Тезкор тадбирнинг кейинги босқичида мазкур шахсга наркотик моддаларни «закладка» усулида тарқатиш бўйича топшириқ берган, 1988 йилда туғилган, илгари гиёҳвандлик воситалари билан боғлиқ жиноят учун судланган аёл ҳам ушланган.
Ҳолат юзасидан Жиноят кодексининг 273-моддаси 6-қисми «а» банди билан жиноят иши қўзғатилиб, гумонланувчиларга нисбатан «қамоқ» эҳтиёт чораси қўлланилган.
Ҳозирда тергов ҳаракатлари давом эттирилмоқда.
