Қурилиш соҳаси Янги Ўзбекистон қиёфасини белгиламоқда — Шавкат Мирзиёев

 

Президент Шавкат Мирзиёев қурувчилар, меъморлар, муҳандислар, лойиҳачилар, машинист ва механиклар ҳамда соҳа фахрийларини Қурилиш соҳаси ходимлари куни билан табриклади.

 

Президент ўз табригида қурилиш соҳаси мамлакатнинг замонавий қиёфасини шакллантириш, ҳудудларни обод қилиш ва аҳоли учун қулай яшаш шароитларини яратишда муҳим ўрин тутаётганини таъкидлади.

 

Қайд этилишича, сўнгги 9 йилда Ўзбекистонда 210 миллион квадрат метрдан зиёд бино ва иншоотлар, жумладан, 647 мингта квартирага эга уй-жойлар барпо этилган. Жорий йилда яна 140 мингта янги квартирани фойдаланишга топшириш режалаштирилган.

 

Шунингдек, 2040 йилгача мамлакатда йилига қуриладиган уй-жойлар сонини 280 мингтагача етказиш ва “Янги Ўзбекистон” массивлари сонини 120 тага кўпайтириш кўзда тутилгани қайд этилди.

 

Табрикда Ислом цивилизацияси маркази, Имом Бухорий ёдгорлик мажмуаси, Бурҳониддин Марғиноний туризм маркази ҳамда Янги Тошкент, Нурафшон, Бобур, Ширин ва Ал Хоразмий каби йирик лойиҳаларда қурувчиларнинг ҳиссаси алоҳида эътироф этилди.

 

Президент соҳада рухсат бериш жараёнлари ва муддатлари қисқартирилгани, “Шаффоф қурилиш” миллий ахборот тизими доирасида замонавий электрон платформалар ишга туширилгани ҳамда назорат жараёнлари рақамлаштирилганини таъкидлади.

 

Шунингдек, қурилишда сунъий интеллект технологияларини кенг жорий этиш, инсон омилини камайтириш ва коррупциявий хавфларнинг олдини олиш борасидаги ишлар давом эттирилиши қайд этилди.

 

Давлат раҳбари соҳа ходимларининг билим ва тажрибаси, касб маҳоратини ошириш ҳамда уларнинг меҳнатини ҳар томонлама рағбатлантириш бундан буён ҳам эътибор марказида бўлишини билдирди.

 

Президент барча қурилиш соҳаси ходимларига мустаҳкам соғлиқ, оилавий бахт-саодат, ишларида янги ютуқ ва омадлар тилади.