Ўзбекистонда болага отасининг исмини фамилия сифатида беришга рухсат берилади
Сенаторлар бу ўзгариш миллий ва диний анъаналарни ҳисобга олишга хизмат қилишини таъкидлади.
Ўзбекистонда болага отасининг исмини фамилия сифатида бериш имконияти қонунчиликда мустаҳкамланмоқда.
Тегишли қонун билан Оила кодексининг 69-моддасига ўзгартиришлар киритилмоқда. Унга кўра, ота-оналарга боланинг фамилиясини белгилашда отасининг исмидан фамилия сифатида фойдаланиш имконияти берилади.
Амалдаги тартибга кўра, боланинг фамилияси ота-онанинг фамилиясига қараб белгиланади. Шу билан бирга, миллий анъаналардан келиб чиқиб, айрим ҳолларда бобонинг исмини боланинг фамилияси сифатида бериш амалиёти ҳам мавжуд.
Янги тартиб ушбу имкониятни қонунчилик даражасида аниқ белгилашга қаратилган.
Сенаторлар боланинг отасининг исмини фамилия сифатида бериш имкониятини қонунчиликда мустаҳкамлаш фуқаролар учун қўшимча қулайлик яратишини таъкидлади. Шунингдек, мазкур ўзгариш миллий ва диний анъаналарни ҳисобга олган ҳолда фуқароларнинг хоҳиш-истакларини амалга оширишга хизмат қилиши қайд этилди.
Қонун билан “Архив иши тўғрисида”ги қонунчиликка ҳам қатор ўзгартиришлар киритилмоқда. Жумладан, архив иши соҳасидаги ваколатли давлат органларининг ваколатлари аниқлаштирилади, нодавлат ва электрон архивларни ташкил этиш тартиблари, шунингдек, архив ҳужжатларининг идоравий архивларда вақтинча сақланиш муддатлари белгиланади.
Фаол муҳокамалардан сўнг қонун сенаторлар томонидан маъқулланди.
