Хитойга “Дельфин” тайфуни ёпирилди: 1 миллиондан ортиқ одам эвакуация қилинди

Хитойнинг шарқий соҳилларига бу йил мамлакатга етиб келган энг кучли тропик циклон — “Дельфин” тайфуни чиқди. Кучли ёмғир ва шамол сабаб мамлакат шарқида транспорт қатнови издан чиқди, 1 миллиондан ортиқ киши хавфсиз ҳудудларга эвакуация қилинди. Бу ҳақда Reuters хабар берди.

 

Хитой метеорология хизмати маълумотига кўра, тайфун 9 август куни соат 17:30 атрофида (Тошкент вақти билан 14:30) Чжетсзян провинциясининг Юхуан шаҳри яқинида қуруқликка чиққан. Ўша вақтда тайфун марказидаги шамол тезлиги секундига 42 метрга (соатига 151 километр) етган. Бу Саффир-Симпсон шкаласи бўйича 1-тоифали довул кучига тенг.

 

“Дельфин” Хитойга етиб келишидан аввал Япониянинг жанубидаги Окинава префектурасидан ўтган. Табиий офат оқибатида олти киши жароҳатланган, 50 мингдан ортиқ бино электр таъминотисиз қолган.

 

Метеорологлар 10 августгача Чжецзян, Шанхай, Фуцзян шимоли, Цзянси шимоли-шарқи, Анхуй маркази ва жануби ҳамда Цзянсу провинциясининг катта қисмида кучли ёмғир ёғишини прогноз қилмоқда. Чжецзяннинг марказий ва шарқий ҳудудларида ёғингарчилик миқдори 250–500 миллиметрга етиши мумкин.

 

Миллий метеорология маркази бош мутахассиси Ван Хайпиннинг CCTV телеканалига маълум қилишича, “Дельфин” тайфуни қуруқликка чиққач, ғарб томон ҳаракатланади. Шундан сўнг у Хитойнинг марказий ва жануби-ғарбий ҳудудларида секинлашиб, аста-секин кучсизланиши кутилмоқда.

 

Бироқ тайфуннинг секин ҳаракатланиши кучли ёғингарчиликнинг узоқроқ давом этишига сабаб бўлиши мумкин. Бу, айниқса, тоғли ҳудудлар ва кичик дарёлар бўйида сув тошқини ҳамда кўчки хавфини оширади.

 

Шанхайда камида 30 300 киши эвакуация қилинган, қарийб 1 500 та авиақатнов бекор қилинган. Шаҳар портларидаги кемалар ҳам хавфсиз жойларга олиб чиқилган. Яншан портидан 500 дан ортиқ кичик ва ўрта ҳажмдаги кема бошпана жойларига кўчирилган.

 

Хитой Сув ресурслари вазирлиги Тсянтанг, Юн, Цзяо ва Шуйян дарёларида кучли сув тошқинлари юзага келиши мумкинлигидан огоҳлантирди. Тайфун энг кучли таъсир кўрсатган ҳудудлардаги кичик дарёларда сув сатҳи хавфли даражадан ошиши мумкин.

 

Расмийлар Чжецзяннинг айрим ҳудудларида кўчки каби геологик хавфлар юқори эканини билдирди. Тоғ сойларидаги сув тошқинлари бўйича қизил даражадаги огоҳлантириш эълон қилинган ҳудудларда аҳолидан эвакуация бўйича маҳаллий ҳокимият кўрсатмаларига қатъий амал қилиш сўралган.

 

Тайфун яқинлашишидан олдин денгиздаги ишчилар хавфсиз ҳудудларга олиб чиқилган, кемаларга портларга қайтиш буюрилган. Сув омборлари, тоғ сойлари, кўчки хавфи юқори ҳудудлар, қурилиш майдонлари ва сайёҳлик масканларида ҳам назорат кучайтирилган.

 

Шанхайда тайфун сабаб парвози бекор қилинган 42 ёшли сайёҳ Чен оиласи билан шаҳарда қолиб кетганини айтган. Улар якшанба куни учиб кетиши керак бўлган.