2025 йилда коррупцион жиноятлар энг кўп Андижонда аниқланган — сенатор
Ўтган йилда Ўзбекистонда коррупцияга оид жиноятлар бўйича 7 517 киши жавобгарликка тортилган.
Ўзбекистонда 2025 йил давомида коррупцияга оид жиноятлар содир этган 7 517 киши жиноий жавобгарликка тортилган. Бу ҳақда 8-август куни бўлиб ўтган Сенат мажлисида сенатор Абдуҳаким Эшмуродов маълум қилди.
Сенаторнинг таъкидлашича, ўтган йил давомида коррупцион жиноятлар оқибатида давлат манфаатларига 2,9 триллион сўмдан ортиқ зарар етказилган.
Коррупцияга оид жиноят содир этган шахслар сони бўйича ҳудудлар кесимида Андижон вилояти етакчи бўлган. Бу ҳудудда 946 нафар шахс аниқланган. Кейинги ўринларда Тошкент вилояти — 793 нафар, Қашқадарё — 745 нафар, Самарқанд — 709 нафар ва Наманган вилояти — 509 нафар билан қайд этилган.
Соҳалар кесимида коррупцион жиноятлар бўйича жиноий жавобгарликка тортилганларнинг асосий қисми мактабгача ва мактаб таълими тизими ходимлари ҳиссасига тўғри келган — 580 нафар.
Шунингдек, маҳаллий ҳокимликларнинг 497 нафар, соғлиқни сақлаш ташкилотларининг 404 нафар, тижорат банкларининг 245 нафар ҳамда олий таълим муассасаларининг 161 нафар ходими жиноий жавобгарликка тортилган.
Абдуҳаким Эшмуродов коррупцияга оид жиноятлар сонининг кўпайишини, аввало, бундай ҳуқуқбузарликларни аниқлаш ва фош этиш бўйича ишлар фаоллашгани билан изоҳлаган.
Шу билан бирга, сенатор вазирлик ва идоралардаги ички назорат тузилмалари фаолиятида самарадорлик етарли эмаслигини қайд этган.
Унинг таъкидлашича, айрим ташкилотларда коррупциянинг олдини олиш учун ташкил этилган комплаенс-назорат тузилмалари амалий профилактика чораларини амалга ошириш ўрнига, асосан ҳисобот тақдим этиш билан чекланиб қолмоқда.
