Афғонистонда 7 та хусусий университет фаолияти бир йилга тўхтатилди

Афғонистон Олий таълим вазирлиги мамлакатдаги 7 та хусусий университет фаолиятини бир йилга тўхтатиб, яна 2 та университетнинг фаолият лицензиясини бекор қилди. Қарор университетларда аниқланган жиддий қоидабузарликлар ва маъмурий камчиликлар ортидан қабул қилинган. Бу ҳақда Олий таълим вазирлигига таяниб Ariana News хабар берди.

Вазирлик маълумотларига кўра, қарор баҳорги семестрда мамлакат бўйлаб хусусий университетларда ўтказилган текширув ва баҳолашлар натижаларига асосланган. Муаммоларни бартараф этиш бўйича бир неча бор огоҳлантириш ва тавсиялар берилганига қарамай, 9 та таълим муассасасида жиддий камчиликлар сақланиб қолган.

Бир йилга фаолияти тўхтатилган университетлар қаторига Жоузжондаги Барлас университети, Балхдаги Раҳ-е Саодат ва Туркистон университетлари, Бадахшондаги Азҳар ва Барна университетлари, Фарёбдаги Рашод университети ҳамда Кобулдаги Паям университети киради.

Шунингдек, Қундуздаги Коҳандуз университети ва Тахордаги Хана-е Данеш университетларининг фаолият лицензиялари бекор қилинган.

Текширувлар давомида қатор университетларда академик ва маъмурий бошқарув тизимида жиддий камчиликлар аниқланган. Жумладан, айрим таълим муассасаларида университет раҳбари, академик ва талабалар масалалари бўйича ўринбосарлар ҳамда факультет раҳбарлари каби асосий лавозимларда тегишли мутахассислар мавжуд бўлмагани қайд этилган.

Бундан ташқари, айрим университетларда амалда дарсларда қатнашмайдиган, бироқ расмий ҳужжатларда рўйхатдан ўтган «арвоҳ талабалар» мавжудлиги аниқланган. Баъзи таълим муассасаларида семестрнинг дастлабки 10 ҳафтасида талабалар давоматини мунтазам қайд этиш талаби ҳам бажарилмаган.

Давомат кўрсаткичи паст бўлгани сабабли ўқишни давом эттириш ҳуқуқидан маҳрум этилиши керак бўлган айрим талабаларга якуний имтиҳонларда қатнашиш, баҳо олиш ва кейинги семестрларга ўтишга рухсат берилгани ҳам аниқланган.

Текширувларда айрим университетларда амалий машғулотлар учун зарур лабораториялар, ускуналар ва материаллар етишмаслиги, шунингдек, вазирлик томонидан тасдиқланган ўқув дастурларига риоя қилинмаётгани ҳам қайд этилган.

Тиббиёт йўналишларида ҳам жиддий камчиликлар аниқланган. Ўқув жараёнининг муҳим қисми шифохоналарда амалиёт ўташни назарда тутганига қарамай, текширув вақтида айрим тиббиёт факультетлари талабалари тегишли шифохоналарда мавжуд бўлмагани маълум қилинган.

Лицензияси бекор қилинган икки университетда эса давомат маълумотларини сохталаштириш ҳолатлари аниқлангани билдирилган. Жумладан, семестр давомида дарсларда қатнашмаган талабалар кейинчалик ўзгартирилган давомат варақаларида қатнашган сифатида қайд этилган.

Вазирлик тегишли қўмита томонидан ўтказилган қўшимча текширувлардан сўнг университетлар фаолиятини тўхтатиш ва лицензияларни бекор қилиш бўйича тавсиялар тайёрланганини, мазкур тавсиялар раҳбарият кенгаши томонидан тасдиқланганини маълум қилган.