Чилонзорда МИБ орқали 18 млрд солиқ қарздорлиги ундирилди
Шу тариқа ижро ҳужжатларининг ижроси амалда тўлиқ таъминланган.
Мажбурий ижро бюросининг Чилонзор туман бўлими иш юритувига Йирик солиқ тўловчилари бўйича Ҳудудлараро солиқ инспекцияси бошлиғининг қарорларига асосан қарздор акциядорлик жамиятидан давлат фойдасига жами 18 560 634 386 сўм миқдоридаги солиқ қарзини ундириш тўғрисидаги ижро ҳужжатлари келиб тушган.
Мазкур ижро ҳужжатлари асосида давлат ижрочилари томонидан Ўзбекистон Республикасининг «Суд ҳужжатлари ва бошқа органлар ҳужжатларини ижро этиш тўғрисида»ги Қонунининг 23-моддаси талабларига мувофиқ ижро иши қўзғатилиб, қарздорга ихтиёрий муддатда ижро этиш ҳақида огоҳлантириш берилган.
Давлат ижрочилари томонидан қарздорга нисбатан қонунчиликда назарда тутилган мажбурий ижро чоралари қўлланилиши натижасида давлат фойдасига 18 560 634 386 сўм миқдоридаги солиқ қарзи тўлиқ ундирилиб, ижро ҳужжатларининг ижроси амалда таъминланди.
