Эрон иқтисодиёти жуда ёмон аҳволда — Трамп

АҚШ президенти Дональд Трамп Эрон иқтисодий вазияти ёмонлашиб бораётганини ва Вашингтон ҳамда Теҳрон ўртасида келишувга эришилиши мумкинлигини билдирди. Бу ҳақда у Axios нашрига берган интервьюсида маълум қилди.

 

Трампнинг таъкидлашича, АҚШ Эрон масаласида «жимгина» ҳаракат қилмоқда ва томонлар ўртасида қисман музокаралар олиб борилмоқда.

 

Америка президенти Эрон иқтисодиётида юқори инфляция ва молиявий муаммолар мавжудлигини қайд этган. Унинг фикрича, Теҳрон ҳозирда иқтисодий жиҳатдан «жуда ёмон аҳволда».

 

Трамп Эрон иқтисодий вазиятининг ёмонлашувини, жумладан, АҚШ томонидан амалга оширилаётган денгиз блокадаси билан боғлаган.

 

Axios хабарига кўра, АҚШ расмийлари Трамп бундан бир ҳафта аввал Эронга қарши кенг кўламли ҳарбий ҳаракатларни қайта бошлашга мойил бўлганини, бироқ кейинчалик вазиятни ҳозирча юмшатиш қарорiga келганини билдирган.

 

Шу билан бирга, Трамп Теҳрон билан келишувга эришиш истиқболи борлигини таъкидлаган. Унинг сўзларига кўра, жараён шахмат ўйинига ўхшайди ва якунда «ҳаммаси яхши бўлади».