Эрон “Макка” пактидан хавотирда эмаслигини билдирди
Теҳрон янги хавфсизлик келишуви Эрон манфаатларига қарши қаратилганига асос кўрмаётганини маълум қилди.
Эрон Ташқи ишлар вазирлиги вакили Исмоил Бағоий Покистон, Туркия ва Саудия Арабистони ўртасида тузилган янги хавфсизлик келишуви Теҳронга қарши қаратилганидан хавотирланиш учун сабаб йўқлигини айтди. Бу ҳақда Reuters хабар берди.
Бағоийга кўра, мазкур келишув минтақа давлатларининг хавфсизлик масалаларида ташқи кучларга таяниш ўрнига ўз имкониятларига кўпроқ суянишга ўтаётганини кўрсатади. У бундай минтақавий ҳамкорликни ижобий баҳолаш мумкинлигини билдирди.
Эрон вакили келишув минтақанинг геосиёсий ва тарихий воқелигини ҳисобга олиши, кенг қамровли ва барча томонлар учун очиқ бўлиши кераклигини таъкидлади. Унинг фикрича, хавфсизликка таҳдидларнинг асл манбалари тўғри аниқланса, бундай ташаббуслар минтақада хавфсизликни мустаҳкамлаш ва беқарорликнинг олдини олишга хизмат қилиши мумкин.
Бағоий баёнотида Исроил ва унинг иттифоқчиларини ҳам тилга олиб, минтақадаги хавфсизлик масалаларида айнан реал таҳдидларни тўғри баҳолаш муҳимлигини қайд этди.
Эслатиб ўтамиз, Покистон, Туркия ва Саудия Арабистони 7 август куни Маккада қўшма мудофаа келишувини имзолаган эди.
