Фарғонада ноқонуний қурилган савдо дўконлари буздирилмоқда
Маълум бўлишича, қарздор қонуний талабларни бажариш ўрнига турли идораларга мурожаат қилиб, ижро жараёнини чўзишга уринган.
Фурқат тумани марказий йўли ёқасида, уч давлат ўртасида барпо этилаётган "DO'STLIK" бозори ва кўнгилочар мажмуаси олдида ноқонуний қурилган савдо дўкони суд қарори асосида мажбурий тарзда буздирилди.
Фуқаролик ишлари бўйича Ўзбекистон туманлараро судининг 2026 йил 6 июндаги қарорига мувофиқ, мазкур ноқонуний қурилмани қарздор з. Рўзиева ўз ҳисобидан бартараф этиши лозим эди. Шу асосда Мажбурий ижро бюроси томонидан ижро иши қўзғатилиб, давлат ижрочиси қарздорни бир неча бор ихтиёрий равишда суд қарорини бажариш ҳақида огоҳлантирган.
Бироқ қарздор қонуний талабларни бажариш ўрнига турли идораларга мурожаат қилиб, ижро жараёнини чўзишга уринган. Лекин суд қарори бажарилиши шарт.
Фурқат туман прокуратураси билан ҳамкорликда ўтказилган мажбурий ижро ҳаракатлари давомида махсус техникалар жалб қилиниб, ноқонуний қурилган савдо дўкони тўлиқ буздирилди ва суд қарори ижроси таъминланди.
