Рақобат қўмитаси биологик фаол қўшимчалар рекламаси бўйича огоҳлантирди

Ўзбекистонда биологик фаол қўшимчалар, малҳамлар, суртма ва бальзамлар, дамламалар ҳамда минерал сувларнинг турли касалликларни даволаши ҳақидаги рекламалар тарқалиши юзасидан Рақобат қўмитаси огоҳлантириш берди.

Қўмита маълумотига кўра, айрим рекламаларда биологик фаол қўшимчалар диабет, инсульт, гастрит, юрак-қон томир, жигар, буйрак, артрит ва гипертония каби касалликларни даволашда самарали восита сифатида кўрсатилмоқда. Бундай тарғибот истеъмолчиларда маҳсулотни дори воситаси сифатида қабул қилишга сабаб бўлиши мумкин.

Қўмита қайд этишича, ваколатли органлар хулосасига кўра, биологик фаол қўшимчаларнинг асосий вазифаси организмнинг фойдали моддаларга бўлган кундалик эҳтиёжини қондиришдан иборат. Улар дори воситаси ҳисобланмайди ва касалликларни даволаш учун мўлжалланмаган.

“Реклама тўғрисида”ги қонуннинг 35-моддасида биологик фаол ва озиқ-овқат қўшимчалари рекламасига қўйиладиган талаблар белгиланган. Унга кўра, бундай маҳсулотлар дори воситаси ёки даволаш хусусиятига эга деган таассурот уйғотадиган тарзда реклама қилинмаслиги керак.

Шунингдек, рекламаларда одамларнинг маҳсулотдан фойдаланиб даволангани ёки аҳволи яхшилангани ҳақидаги ҳолатларга ҳавола қилиш, фуқароларнинг миннатдорчиликлари ёки тавсияларидан фойдаланиш ҳам мумкин эмас. Маҳсулотнинг тадқиқотлардан ўтгани ёки давлат рўйхатидан ўтказилгани ҳақида маълумот бериш орқали унинг дори воситаларидан устунлиги ҳақида тасаввур уйғотишга ҳам йўл қўйилмайди.

Бундан ташқари, биологик фаол қўшимчалар рекламаси «Ушбу маҳсулот дори воситаси эмас» мазмунидаги огоҳлантириш билан берилиши шарт.

Қонунчилик талабларини бузганлик учун молиявий санкциялар қўлланиши мумкин.