Туркия, Покистон ва Саудия Арабистони қўшма ҳарбий машғулотлар ўтказади
Мазкур режалар уч давлат ўртасида 7 август куни имзоланган Макка келишуви доирасида амалга оширилади.
Туркия, Покистон ва Саудия Арабистони мудофаа соҳасидаги ҳамкорликни кенгайтириш, ҳарбий тажриба алмашиш ва қўшма машғулотлар ўтказишни режалаштирмоқда.
Turkiye газетеси нашри хабарига кўра, мазкур режалар уч давлат ўртасида 7 август куни имзоланган Макка келишуви доирасида амалга оширилади. Келишув Туркия парламенти томонидан кузги сессияда ратификация қилинганидан сўнг кучга кириши кутилмоқда.
Келишув доирасидаги ҳарбий ҳамкорликнинг дастлабки босқичида уч давлат ўртасида ҳарбий хизматчилар алмашинуви йўлга қўйилиши режалаштирилган. Бу узоқ муддатли ҳарбий ҳамкорлик учун асос яратиши кўзда тутилмоқда.
Шунингдек, Туркия, Покистон ва Саудия Арабистони қуролли кучларининг эҳтимолий инқирозли вазиятларда ўзаро ҳамкорлигини кучайтириш мақсадида қўшма ҳарбий машғулотлар ўтказади.
Келишув доирасида эҳтимолий хавфларни олдиндан аниқлашга хизмат қилувчи эрта огоҳлантириш механизмини яратиш ҳам назарда тутилган. Туркия томони ушбу механизм келишувнинг олдини олиш ва мудофаа салоҳиятини кучайтиришини таъкидлаган.
Макка келишуви 7 август куни Саудия Арабистони валиаҳд шаҳзодаси Муҳаммад бин Салмон, Туркия президенти Ражаб Тоййиб Эрдўған ва Покистон бош вазири Шаҳбоз Шариф томонидан имзоланган.
Келишувнинг асосий қоидаларидан бирига кўра, уч давлатдан бирига қилинган қуролли ҳужум барча томонларга қарши тажовуз сифатида баҳоланади.
