UEFA Инфантиноға қарши тергов бошлаши мумкин
Текширув Инфантино UEFA бош котиби бўлиб ишлаган даврда собиқ ходимага тўланган олти хонали компенсация билан боғлиқ бўлиши мумкин.
Европа футбол ассоциациялари иттифоқи (UEFA) FIFA президенти Жанни Инфантинонинг ташкилотдаги фаолияти юзасидан тергов бошлаши мумкин. Бу ҳақда The Telegraph хабар берди.
Нашр маълумотларига кўра, эҳтимолий текширув Инфантино UEFA бош котиби лавозимида ишлаган даврда у билан шахсий муносабатда бўлган собиқ ходимага тўланган олти хонали компенсация билан боғлиқ бўлиши мумкин.
Хабарларга кўра, ушбу ходима дастлаб маъмурий лавозимда фаолият юритган, кейинчалик эса юқори лавозимга кўтарилиб, унинг маоши 30 фоизга оширилган. Шунингдек, UEFA ходима ташкилотни тарк этганидан сўнг унинг бизнес мактабидаги MBA таълими учун ҳам маблағ ажратгани айтилмоқда.
Мазкур ҳолатлар ташкилот ходимлари орасида манфаатлар тўқнашуви юзасидан саволлар туғдиргани билдирилган. Ўша вақтдаги UEFA президенти Мишель Платини бу масалани Инфантино билан муҳокама қилгани ва кейинчалик ходимага компенсация тўлаб, ташкилотни тарк этиш бўйича келишувга эришилгани айтилмоқда.
UEFA ходимага ишдан бўшаш нафақаси ва MBA дастури учун маблағ тўланганини тасдиқлаган. Ташкилот ушбу тўловлар ўша пайтда амалда бўлган ички қоидаларга мувофиқ амалга оширилганини билдирган.
FIFA эса Инфантино номидан унинг собиқ ходима билан ноўрин муносабатда бўлгани ёки бошқа қонунбузарликларга йўл қўйгани ҳақидаги даъволарни рад этган.
The Telegraph манбаларига кўра, эҳтимолий тергов Инфантинонинг UEFAда 2000–2016 йиллар давомида олиб борган фаолиятини қамраб олиши мумкин. Хусусан, собиқ ходимага тўловлар ҳамда эҳтимолий шахсий муносабатлар кадрлар бўйича қарорларга таъсир кўрсатган-кўрсатмаганига аниқлик киритилиши кутилмоқда.
Инфантино 2009–2016 йилларда UEFA бош котиби лавозимида ишлаган. 2016 йилда FIFA президенти этиб сайланган ва кейинчалик икки марта рақибсиз қайта сайланган.
