Жанубий Корея Украинага ҳалокатли қурол етказиб бермайди — Yonhap
Аввалроқ Украина президенти Владимир Зеленский Сеулни Киевга ҳаво мудофааси тизимларини етказиб беришга чақирганди.
Жанубий Корея Украинага ҳалокатли қурол-яроғ етказиб бермаслик сиёсатига содиқ қолмоқда. Бу ҳақда Yonhap ахборот агентлиги мамлакат Ташқи ишлар вазирлигининг юқори лавозимли вакилига таяниб хабар берди.
Маълум қилинишича, Жанубий Корея ҳарбий техника ва бошқа таъминотларни фақат амалдаги ички қонунчилик талабларига мувофиқ етказиб беради. Мамлакат қонунчилиги эса қуролли можаролар давом этаётган давлатларга ҳалокатли қурол етказиб беришни чеклайди.
Аввалроқ Украина президенти Владимир Зеленский Сеулни Киевга ҳаво мудофааси тизимларини етказиб беришга чақирганди. Бироқ Жанубий Корея ҳукумати бу масалада эҳтиёткор позицияни сақлаб қолмоқда.
Ташқи ишлар вазирлиги вакилининг таъкидлашича, Сеул Украинага энергетика, инфратузилма, соғлиқни сақлаш ва таълим каби йўналишларда ёрдам кўрсатишда давом этмоқда. Шунингдек, Украинада тинчликни тиклаш ва урушдан кейинги қайта қуриш билан боғлиқ таклифлар ҳам кўриб чиқилиши мумкин.
Жанубий Корея шу пайтгача Украинага гуманитар ва молиявий ёрдам, шунингдек, ҳалокатли бўлмаган ҳарбий техникаларни етказиб берган. Бироқ мамлакат Киевга қурол-яроғ етказиб беришдан тийилиб келмоқда.
