Башар Асад ўлим жазосига ҳукм қилинди
Шунингдек Сурия суди собиқ президентнинг укаси Маҳер Асад ва амакиваччаси, Суриянинг собиқ ҳарбий амалдори Атеф Нажибни ҳам ўлим жазосига ҳукм қилди.
Сурия суди мамлакатнинг собиқ президенти Башар Асадни инсониятга қарши жиноятлар ва уруш жиноятлари содир этганликда айбдор деб топиб, сиртдан ўлим жазосига ҳукм қилди. Бу ҳақда SANА хабар берди.
Суд қарорига кўра, Башар Асаднинг укаси Маҳер Асад ҳам худди шу иш доирасида сиртдан ўлим жазосига ҳукм қилинган. Шунингдек, Асаднинг амакиваччаси, Суриянинг собиқ ҳарбий амалдори Атеф Нажиб ҳам ўлим жазосига ҳукм қилинди. У суд мажлисида иштирок этган.
Суд ишида 14 йил давом этган фуқаролар уруши даврида содир этилган инсониятга қарши жиноятлар ва уруш жиноятлари кўриб чиқилган. Мазкур уруш оқибатида қарийб 500 минг киши ҳалок бўлган, миллионлаб сурияликлар эса ўз уйларини тарк этишга мажбур бўлган.
Атеф Нажиб 2011 йилда Суриянинг Дараа вилоятида ҳукуматга қарши намойишларни шафқатсизларча бостиришга раҳбарлик қилганликда айбдор деб топилган. Айнан шу воқеалар кейинчалик мамлакатда узоқ давом этган фуқаролар урушига олиб келган.
Нажиб суд вақтида судланувчилар қафасида қамоқхона кийимида бўлган.
Башар ва Маҳер Асад 2024 йил декабрь ойида исёнчи кучлар Дамашқни эгаллаб олганидан сўнг Сурияни тарк этиб, Россияга қочган. Шундан кейин Башар Асад ҳокимиятдан ағдарилган.
Атеф Нажиб эса кейинчалик қўлга олиниб, Асад режимининг судга тортилган юқори мартабали собиқ амалдорларидан бирига айланган. У аввал Сурия армиясида бригада генерали бўлиб хизмат қилган ва 2011 йилда Дараа вилоятидаги Сиёсий хавфсизлик бошқармасига раҳбарлик қилган.
Башар Асад ва Маҳер Асад суд жараёнида иштирок этмаган ва уларга нисбатан ҳукм сиртдан чиқарилган.
