СССРни тиклаш ғоясини тарғиб қилган фуқаро 4 йилга қамалди
Азиз Ҳакимов туҳмат, ҳақорат қилиш ва миллий, ирқий, этник ёки диний адоват қўзғатишда айбдор деб топилди.
Жиноят ишлари бўйича Шайхонтоҳур туман судида блогер Азиз Ҳакимовга нисбатан жиноят иши бўйича ҳукм ўқилди. Бу ҳақда Тошкент шаҳар судлари хабар берди.
Суднинг ёпиқ мажлисида Ҳакимов Жиноят кодексининг 139-моддаси 2-қисми (туҳмат), 140-моддаси 2-қисми (ҳақорат қилиш) ва 156-моддаси 2-қисмида (миллий, ирқий, этник ёки диний адоват қўзғатиш) назарда тутилган жиноятларни содир этганликда айбдор, деб топилди.
Унга жазоларни қисман қўшиш йўли билан 4 йил 2 ой муддатга озодликдан маҳрум қилиш жазоси тайинланди. Жазони ўташ муддати 2025 йил 26 сентябрдан ҳисобланиши белгиланди.
Шу билан бирга, суд Ҳакимовнинг ҳаракатларида Жиноят кодексининг 150-моддасида назарда тутилган урушни тарғиб қилиш жинояти таркиби мавжуд эмас, деган хулосага келди. Шу асосда мазкур айблов бўйича у оқланди.
Суд ҳукмига кўра, Рақамли технологиялар вазирлигига Ҳакимов юритган Телеграмъдаги «Cомраде_Азиз» каналини блоклаш мажбурияти ҳам юклатилди.
Иш бўйича 6 нафар жабрланувчига етказилган моддий ва маънавий зарарни ундириш масаласида фуқаролик ишлари бўйича судга мурожаат қилиш ҳуқуқи тушунтирилди.
Шунингдек, судланувчига ҳукм устидан юқори суд инстанциясига шикоят бериш тартиби ва муддати тушунтирилган.
