Озодбек Назарбековга парламент сўрови юборилди

Олий Мажлис Қонунчилик палатаси мажлисида санъат таълими муассасаларидаги мавжуд муаммолар муҳокама қилиниб, маданият вазири Озодбек Назарбековга парламент сўрови юборилди.

 

Депутатлар ҳудудларда ўтказган ўрганишлар ва таълим муассасаларидан олинган маълумотлар соҳада қатор тизимли муаммолар сақланиб қолаётганини кўрсатганини таъкидлади.

 

Маълум қилинишича, республикада 326 та болалар мусиқа ва санъат мактаби барпо этилган. Қатор таълим муассасалари реконструкция қилиниб, мусиқа чолғулари ва ўқув жиҳозлари билан таъминланган. Бироқ айрим муассасаларнинг бинолари капитал таъмирга муҳтож.

 

Жумладан, Термиз, Фарғона, Урганч, Самарқанд ва Навоий шаҳарларидаги ихтисослаштирилган санъат мактаблари, Андижон шаҳридаги Шерали Жўраев номидаги мусиқа ва санъат олий мактаби ҳамда Тошкент шаҳридаги Р.Глиэр номидаги республика ихтисослаштирилган санъат мактаби биноларида капитал таъмирга эҳтиёж борлиги аниқланган.

 

Шунингдек, 2020 йилдаги президент қарорида белгиланган Бухоро, Қарши, Наманган ва Урганч шаҳарларида ихтисослаштирилган бошланғич рақс санъати мактаб-интернатларини ташкил этиш вазифаси ҳам тўлиқ бажарилмаган.

 

Бухоро ихтисослаштирилган санъат мактаби учун бир гектар ер майдони ажратилган ва 43 млрд сўмлик лойиҳа-смета ҳужжатлари тайёрланган. Бироқ маблағ ажратилмагани сабабли қурилиш ишлари бошланмаган.

 

Айрим мусиқа ва санъат таълими муассасаларида ўқувчилар сони биноларнинг лойиҳа қувватидан юқори экани, машғулот хоналарининг акустик ҳолати талабга жавоб бермаслиги, махсус синф хоналари ва концерт заллари етишмаслиги қайд этилган.

 

Кадрлар масаласида ҳам муаммолар бор. Хусусан, айрим муассасаларда концертмейстерлар ҳамда тор ихтисосликлар бўйича педагоглар етишмайди.

 

Шу муносабат билан депутатлар маданият вазиридан санъат таълими муассасаларини зарур жиҳозлар ва ўқув-услубий воситалар билан таъминлаш, таълим сифати ва кадрлар салоҳиятини ошириш, педагоглар малакасини ошириш ва аттестациядан ўтказиш тизимини такомиллаштириш, шунингдек, мактаб-интернатларни тарбиячилар билан таъминлаш бўйича амалга оширилаётган ишлар юзасидан асослантирилган тушунтириш беришни сўради.