Темурийлар даврига оид 50 та тарихий ашё 3D форматда рақамлаштирилади

 

Ўзбекистонда хорижий музей ва коллекцияларда сақланаётган Темурийлар даврига оид тарихий ашёларни замонавий технологиялар ёрдамида рақамлаштиришга қаратилган илмий лойиҳа амалга оширилмоқда.

 

Темурийлар даври илм-фан, меъморчилик, адабиёт, тасвирий ва амалий санъат юксак ривожланган давр сифатида жаҳон тамаддуни тарихида алоҳида ўрин эгаллайди. Ушбу даврга оид моддий ва маданий мероснинг бир қисми бугунги кунда хорижий музейлар, кутубхоналар ҳамда шахсий коллекцияларда сақланмоқда.

 

Инновацион ривожланиш агентлиги томонидан Мустақилликнинг 35 йиллиги арафасида “Олима аёллар” танлови доирасида “Хорижий музейларда сақланаётган темурийларга оид ашёларнинг 3D модели ва анимацион тасвирини яратиш” лойиҳаси молиялаштирилди.

 

Лойиҳанинг асосий мақсади Россия, Буюк Британия ва Туркиядаги музейларда сақланаётган Темурийлар даврига оид 50 та тарихий ашёнинг 3D моделларини ҳамда анимацион тасвирларини яратишдан иборат.

 

Лойиҳа доирасида мазкур давлатлардаги музейларга амалга оширилган амалий сафарлар давомида 50 та тарихий ашёнинг юқори сифатли фотоматериаллари тўпланган. Ушбу материаллар асосида ашёларнинг рақамли 3D моделлари яратилади.

 

Шунингдек, мавжуд тарихий картиналар анимацияга айлантирилиб, улар асосида видеомаҳсулотлар тайёрланади. Ҳар бир тарихий ашё учун ўзбек тилида илмий тавсиф ва аннотация ҳам ишлаб чиқилади.

 

Лойиҳа раҳбари Дилафруз Қурбонованинг таъкидлашича, хорижда тарқоқ ҳолда сақланаётган Темурийлар меросини ягона рақамли ва илмий ахборот маконига жамлаш лойиҳанинг муҳим йўналишларидан биридир.

 

Яратиладиган 3D моделлар музейлар, таълим муассасалари, тадқиқотчилар ва кенг жамоатчилик учун замонавий рақамли ресурс вазифасини бажаради. Шунингдек, Темурийлар тарихи давлат музейининг temurid.uz сайти янги илмий ва визуал контентлар билан бойитилади.

 

Рақамли материаллар тарихий ашёларни виртуал муҳитда намойиш этиш, уларни кенг аудиторияга таништириш, илмий тадқиқотлар учун фойдаланиш ҳамда маданий туризмга қизиқишни оширишга хизмат қилиши кутилмоқда.

 

Лойиҳа доирасида яратиладиган 3D моделлар ва анимацион маҳсулотларни интеллектуал мулк объектлари сифатида ҳуқуқий ҳимоя қилиш ҳам режалаштирилган.

 

Келгусида ушбу рақамли маҳсулотлар Ўзбекистон ва хорижий музейлар ўртасидаги илмий-маданий ҳамкорликни ривожлантириш ҳамда янги инновацион лойиҳаларни амалга ошириш учун хизмат қилиши кутилмоқда.