Тошкентда Telegram'даги наркодўконнинг икки “oмборчиси” ушланди
Уларнинг яшаш манзилларидан 2 килограмм гашиш ёғи, марихуана ва гашиш аниқланди.
Жорий йилнинг 3 август куни ИИВ Тезкор-қидирув департаменти ва унинг ҳудудий бўлинмалари ҳамкорлигида Тошкент шаҳрининг Яккасарой ва Чилонзор туманларида тезкор тадбирлар ўтказилди. Тадбирлар давомида 1993 йилда туғилган шахс ҳамда 1992 йилда туғилган, аввал судланган унинг жиноий шериги гиёҳвандлик воситаларини «закладка» усулида тарқатаётган вақтида ушланган.
Уларнинг «Nеxiа-3» русумли автомобили кўздан кечирилганда, 20 грамм гашиш ёғи аниқланиб, далилий ашё сифатида расмийлаштириб олинган.
Терговга оид дастлабки маълумотларга кўра, улар 2025 йилдан буён Telegram платформасидаги наркодўконда омборчи сифатида фаолият юритиб, ойига қарийб 10 килограммгача турли хил гиёҳвандлик воситаларини тарқатиб келган.
Тезкор тадбир давомида гумонланувчиларнинг яшаш манзиллари ҳам кўздан кечирилди. Натижада у ердан 2 килограмм гашиш ёғи, марихуана ва гашиш, шунингдек, гиёҳвандлик воситаларини қадоқлаш ва тарқатишда фойдаланилган изоляцион ленталар ҳамда бошқа ашёлар топилган.
ИИВ маълумотига кўра, тадбирлар натижасида жами 2 килограмм 170 грамм, яъни тахминан 10 700 дозага тенг гиёҳвандлик воситалари истеъмолдан олиб қўйилган.
Мазкур ҳолат юзасидан ушбу шахсларга нисбатан Жиноят кодексининг 273-моддаси 6-қисми билан жиноят иши қўзғатилган. Ҳозирда ҳолат юзасидан тегишли тергов ҳаракатлари олиб борилмоқда.
