Трамп Эрондан АҚШ аскарлари ўлими учун компенсация талаб қилмоқда
АҚШ президенти бу масалани Теҳрон билан келгусидаги музокараларда кўтаришини айтди.
АҚШ президенти Дональд Трамп Эрон ҳукуматидан америкалик ҳарбий хизматчиларнинг ўлими ва жароҳатланиши билан боғлиқ зарарлар учун компенсация талаб қилиш ниятида эканини маълум қилди. Бу ҳақда TASS хабар берди.
Трампнинг айтишича, Вашингтон Эрон билан келгусидаги музокараларда америкалик ҳарбийларнинг турли можаролар, жумладан, йўл бўйидаги портлашлар оқибатида ҳалок бўлгани ва яралангани масаласини кўтаради.
АҚШ президенти, шунингдек, сўнгги 50 йил давомида Эрондаги норозилик намойишларида жабрланган фуқаролар оилаларига ҳам Эрон томонидан компенсация тўланиши керак, деган позицияни илгари сурган.
Трамп бу масалаларни АҚШнинг Эрон билан бўлажак музокараларида аниқ баён қилиш бўйича ўз вакилларига топшириқ берганини айтган.
АҚШ президенти, шунингдек, аввалги можаролар давомида америкалик ҳарбийларнинг ўлимида Эроннинг жавобгарлиги борлигини таъкидлаб, компенсация талабларини кенгайтириш ниятида эканини билдирган.
