Трамп маъмурияти 175 мингдан ортиқ АҚШ визасини бекор қилди
АҚШ Давлат департаменти визалар асосан жиноий фаолият, виза қоидаларини бузиш, фирибгарлик ва миллий хавфсизликка таҳдидлар билан боғлиқ ҳолатлар сабаб бекор қилинганини билдирди.
АҚШ Давлат департаменти Доналд Трамп президентлигининг иккинчи муддати давомида хорижий фуқароларга берилган 175 мингдан ортиқ визани бекор қилганини маълум қилди. Департамент бу қарорлар визалардан фойдаланиш шартларига риоя этилишини таъминлашга қаратилган доимий текширувлар натижаси эканини билдирди. Бу ҳақда Reuters хабар берди.
Департамент маълумотларига кўра, бекор қилинган визаларнинг катта қисми ҳуқуқни муҳофаза қилувчи органлар билан боғлиқ ҳолатлар, жумладан, жиноят содир этиш, шунингдек виза талабларини бузиш ва фирибгарлик билан боғлиқ. Ҳужжатда зўравонликка чақириқлар ҳамда миллий хавфсизликка таҳдид солиши мумкин бўлган ҳолатлар ҳам сабаблар қаторида келтирилган.
Визалар бекор қилинишига олиб келган жиноятлар орасида тажовуз, маст ҳолда автомобиль бошқариш, ўғрилик ва гиёҳванд моддалар билан боғлиқ ҳуқуқбузарликлар ҳам қайд этилган. Департамент айрим аниқ ҳолатларни ҳам келтирган, жумладан, оғир зўрлаш ва жинсий тажовузда айбланган, одам ўғирлаш ва одам савдосида гумон қилинган ҳамда болаларга нисбатан жинсий зўравонлик материалларини сақлашда айбланган шахсларнинг визалари бекор қилинган.
Шунингдек, Шимолий Африкадаги АҚШ элчихоналаридан бири 100 дан ортиқ визани АҚШга асосан фарзандини у ерда дунёга келтириш ва унга АҚШ фуқаролигини олиш мақсадида борган деб гумон қилинган ота-оналардан бекор қилган.
Давлат департаменти айрим визалар хорижий фуқароларнинг Чарли Киркнинг ўлдирилишини олқишлагани билан боғлиқ баёнотлари сабаб ҳам бекор қилинганини маълум қилди. Департамент бундай шахсларни аниқлаш ва текшириш давом эттирилишини билдирди.
