Ўзбекистонда 29 триллион сўмлик ноқонуний маблағларнинг чиқиб кетишининг олди олинди

Ўзбекистонда 2026 йилнинг дастлабки олти ойида жиноятчиликка қарши курашиш ва кибержиноятларнинг олдини олиш борасида қатор чоралар кўрилди. Натижада 29 триллион сўмлик ноқонуний маблағларнинг чиқиб кетишига йўл қўйилмади ҳамда жиноятларга алоқадор 18 838 та банк картаси блокланди.

 

Ички ишлар вазирлиги матбуот хизматининг маълум қилишича, ҳисобот даврида республикадаги жиноятчилик ҳолати, жумладан, оғир ва ўта оғир жиноятларни аниқлаш ва олдини олиш, маҳаллаларда хавфсиз муҳит яратиш ҳамда жамоат хавфсизлигини таъминлаш бўйича амалга оширилган ишлар таҳлил қилинган.

 

Марказий банк билан ҳамкорликда жорий этилган махсус тизим орқали ноқонуний маблағларнинг банк тизимидан чиқариб юборилишининг олди олинган.

 

Ҳисобот даврида жами 9 282 та кибержиноят фош этилган. Шунингдек, 4 011 та ўзбошимчалик билан содир этилган жиноят аниқланиб, 13 мингдан ортиқ фуқарога етказилган 120 миллиард 496 миллион сўмдан зиёд моддий зарар қопланган.

 

Кибержиноятчиликнинг олдини олиш мақсадида аҳолини огоҳлантириш ва тушунтириш ишлари ҳам кучайтирилган. Ўтказилган тарғибот тадбирлари орқали 23 миллиондан ортиқ фуқаро қамраб олинган.

 

Замонавий технологиялардан самарали фойдаланиш, ходимларнинг тезкор фаолияти ҳамда фуқароларнинг ҳамкорлиги натижасида жиноятларни очиш кўрсаткичи 31,4 фоизга яхшиланган. Натижада фуқароларга жами 1 триллион 365 миллиард сўм миқдоридаги моддий зарар ундириб берилган.

 

Ҳисобот даврида суд ва тергов органларидан яшириниб, жавобгарликдан қочиб юрган 5 010 нафар қидирувдаги шахс ушланган. Шунингдек, яшаш жойини тарк этган ёки бедарак йўқолган 2 616 нафар фуқаронинг манзили аниқланиб, уларнинг хавфсизлиги таъминланган.

 

Жорий йилнинг дастлабки олти ойида республикада жами 125 387 та оммавий тадбир ўтказилиб, уларда 70 миллиондан ортиқ фуқаронинг хавфсизлиги таъминланган.

 

Шунингдек, ҳисобот даврида олдини олиш мумкин бўлган жиноятларнинг 87 фоизи очилгани қайд этилган. Жиноятчиликка қарши курашиш ва жиноятларни прогноз қилиш бўйича янги механизмларни жорий этиш борасидаги ишлар давом эттирилмоқда.

 

Шу билан бирга, 476 та маҳалланинг “қизил” тоифада қолаётгани танқидий баҳоланиб, ушбу ҳудудларда жиноятчиликни келтириб чиқараётган омилларни бартараф этиш ва профилактик ишларни кучайтириш бўйича вазифалар белгиланди.

 

Ҳисобот даврида фуқаролардан жами 205 154 та мурожаат келиб тушган. Уларнинг 87,7 фоизи қаноатлантирилган, 11,3 фоизига малакали юридик маслаҳат берилган, 0,9 фоизи эса қонунчиликда белгиланган тартиб ва асосларга кўра рад этилган.