Ўзбекистонда оила аъзоларини яшаш жойида рўйхатдан ўтказиш тартиби соддалаштирилади

 

Қонунчилик палатаси фуқароларни яшаш жойи ва турган жойи бўйича рўйхатдан ўтказиш тартибини соддалаштиришга қаратилган қонун лойиҳасини биринчи ўқишда маъқуллади.

 

Қонун лойиҳаси аҳолини рўйхатдан ўтказиш жараёнларини янада соддалаштириш ва фуқароларнинг конституциявий ҳуқуқларини тўлиқ таъминлашга қаратилган.

 

Ҳужжатда бир қатор муҳим янгиликлар назарда тутилмоқда. Хусусан, оила аъзолари ва яқин қариндошлари турган жойи бўйича рўйхатдан ўтказишда уй-жой майдонининг ижтимоий нормасини қўллаш билан боғлиқ чекловлар бекор қилинмоқда.

 

Яъни, эр-хотин, ота-она ва фарзандлар, бува-буви ва неваралар, ака-ука ва опа-сингиллар хонадон майдони белгиланган меъёрдан кам бўлган тақдирда ҳам бир манзилда рўйхатдан ўтишлари мумкин бўлади.

 

Шунингдек, талабалар турар жойларида яшаётган талабаларни рўйхатдан ўтказишда уй-жой майдонининг ижтимоий нормаси қўлланилмаслиги белгиланмоқда. Бу талабаларни ётоқхоналарда рўйхатдан ўтказиш билан боғлиқ амалий муаммоларни бартараф этишга хизмат қилиши кутилмоқда.

 

Қонун лойиҳасида ипотека кредити ёки субсидия асосида уй-жой сотиб олган фуқароларни ўз уйида рўйхатдан ўтказиш масаласига ҳам алоҳида эътибор қаратилган.

 

Унга кўра, уй-жойга тақиқ ёки хатлов қўйилган бўлса ҳам, мулкдор ва унинг яқин қариндошларини мазкур манзилда рўйхатдан ўтказиш учун банк, суд ёки Мажбурий ижро бюросининг розилигини олиш талаб этилмайди.

 

Шу билан бирга, кредиторлар ва давлат органларининг қонуний манфаатларини ҳимоя қилиш мақсадида рўйхатдан ўтказилаётган шахснинг олдиндан ёзма розилиги институти жорий этилиши таклиф қилинмоқда. Бу механизм орқали айрим ҳолатларда ваколатли органнинг мурожаатига асосан шахснинг рўйхатдан ўтказилгани бекор қилиниши мумкин.

 

Қонун лойиҳаси Қонунчилик палатаси томонидан биринчи ўқишда маъқулланди.